حصد الإعلان الرسمي لفيلم «أسد» جائزة أفضل إعلان تشويقي (تيزر) في منطقة الشرق الأوسط وشمال أفريقيا ضمن النسخة الخامسة من The Global Entertainment Awards في فبراير الماضي، والتي تسلمها المونتير ماركوس عريان الذي نفّذ «التريلر» لتكون المرة الثالثة التي يحصد تلك الجائزة عن أعماله، وتكون الجائزة الأولى التي يحصدها الفيلم قبل حتى موعد عرضه الذي انطلق حاليًا في مصر.
وخلال المؤتمر الصحفي لفيلم «أسد»كان لموقع «نجوم إف.إم» حوار خاص مع المونتير ماركوس عريان للحديث بشكل مفصّل عن تنفيذ الإعلان الرسمي لفيلم «أسد» الذي جذب انتباه الجمهور من اللحظة الأولى.
وتحدث المونتير ماركوس عريان عن الفكرة التي عمل عليها لتنفيذ الإعلان مع المخرج محمد دياب، وقال: «أولًا الفيلم نفسه حلو، ومدينا فرصة إن إحنا نجرب، وده بالتعاون مع المخرج محمد دياب، يعني أعتقد هو ليه دور كبير قوي في ده، لأنه إداني الحرية إن إحنا نجرب، وننوّع، ونشوف طريقة، ونغيّر مزيكا، ونحاول نلعب بشكل مختلف، لغاية لما وصلنا للنسخة دي، وهو بصراحة شجعني كتير جدًا، وكان مدّيني مساحة من الإبداع بشكل كبير جدًا، يعني. فكان الموضوع بشكل بينج بونج، يعني أقول له فكرة، فهو يقولّي فكرة أحلى، وأدّي له فكرة تانية، فنبتدي، فلقينا إن النيخة اللي إحنا وصلنا لها بقت بتتطور أكتر وأكتر».
وتحدث في حواره لـ«نجوم إف.إم» عن توقيت العمل على تريلر الفيلم، وقال: «أنا بشتغل على حسب ظروف الفيلم. يعني أوقات شغلي بيبدأ مع التصوير، لأن أوقات بنبقى محتاجين نعمل إعلان، والفيلم لسه ما خلصش كله على بعضه. وأوقات بيبقى الفيلم خلص، وببتدي أنا أشتغل عليه، لكن في “أسد” الفيلم كان خلصان، فاشتغلنا على التريلر وخلصناه».
كانت الفكرة الجاذبة في الإعلان التشويقي لفيلم «أسد» هو الصمت الذي ترك البطولة لتعبيرات وجوه الأبطال وحركاتهم إلى جانب أنفاس بطل العمل محمد رمضان التي تصاعدت مع حدة المشاهد، وتحدث المونتير ماركوس عريان عن تلك الفكرة وقال: «أول لقطة إحنا حطيناها في التريلر، هي محمد رمضان وهو طالع مضروب، باين على وشه آثار الضرب، ودي أول مرة نشوف محمد رمضان بالشكل ده، فده اللي إحنا كنا عايزين نوصله للناس، إن الناس تفضل تسأل أسئلة كتير: إيه اللي حصل؟ وإيه اللي وصل محمد رمضان إنه يتضرب ويوصل بالشكل ده؟ فكان اختيار إن إحنا ما نحطش ولا جملة، ولا كلمة، وبس النفس ده يدي مساحة للجمهور يبتدي يخمّن ويسأل: إيه اللي حصل؟ وإيه اللي وصل محمد رمضان إنه يبقى بالشكل ده؟».
*صورة من الشركة المنتجة لفيلم أسد
مواضيع ممكن تعجبك
أحدث الأخبار
