تستمع الآن

هاني عادل لـ«نجوم إف.إم»: «المنافسة الزيادة بين فرق الأندرجراوند بيعملها الجمهور»

الخميس - ٢٦ مايو ٢٠٢٢

تحدث أعضاء فرقة HOH وهم هاني عادل وهاني الدقاق وعازف الجيتار أوسو، عن كواليس تدشين الفريق والعمل سويًا رغم أن كل منهم يعمل في فرقته المستقلة التي تحقق نجاحًا بالفعل وعن المنافسة في وسط موسيقى الأندرجراوند، وذلك خلال لقائهم مع إيهاب صالح في «بكرة النهارده» على «نجوم إف.إم».

وقال المطرب هاني الدقاق عضو فرقة «مسار إجباري» عن فكرة المنافسة بين فرق الأندرجراوند: «أنا لما باجي أسمع حاجة بسمع حاجات وسط البلد وهاني عادل لوحده وهو نفس الفكرة، وإحنا بنحب حاجات بعض فبنحب نلعبها مع بعض، وإحنا بنخرج ونتفسح سوا».

كما أكد هاني عادل عضو فرقة «وسط البلد» على نفس الفكرة قائلًا: «مفيش وقت للفرهدة وإحنا عدينا المرحلة دي إحنا ناس بتحب المزيكا بنتقابل ونلعب مع بعض بس».

وتابع هاني عادل كاشفًا عن أسباب المنافسة التي قد تبدو بين الفرق: «المنافسة عامة بيعملها الجمهور للفرق الموجودة فعلًا، وإحنا من زمان كنا بنروح نسمع بعض حتى وإحنا بنعزف في فرق تانية قبل كده، لكن المنافسة والحاجات الزيادة دلوقت من الجمهور والسوشيال ميديا وده ساعات بيحصل غصب عن الناس، لكن إحنا لو روحنا في الحتة دي مش هنعمل المزيكا اللي إحنا عاوزينها هنبقى بندور الناس عاوزة إيه».

وتحدث عازف الجيتار أوسو عن تعارفه على أعضاء فرقة HOH، وقال: «قابلت هاني عادل من 25 سنة ولعبنا مع بعض في فرقة افتكاسات، وأنا وهاني الدقاق في نفس الاستوديو مع بعض من 7 سنين وأصحاب من 2005 فإحنا أصدقاء، وعمومًا معظم الفرق طالعة من بعضها جزء من هنا وجزء من هنا بيعمل فرقة جديدة وهكذا».

وأكد على مصطلح المنافسة الإيجابية بين الفرق، وأوضح: «فيه أكيد منافسة ده الطبيعي بين البني آدمين لكن بشكل إيجابي بنسبة مثلًا 90% وأكيد فيه الجزء اللي مش إيجابي، وعمومًا حتى لو لقيت حد من أصحابك عاملين حاجة كويسة فبتسخنك تعمل حاجة حلوة».

ويلتقي أعضاء فرقة «وسط البلد» و«مسار إجباري» وHOH مساء غد الجمعة في السابعة والنصف مساء في انطلاق موسم Non Stop Music الموسيقي على مسرح الماركيه في كايرو فيستيفال سيتي.


الكلمات المتعلقة‎


مواضيع ممكن تعجبك