عبرت الفنانة حورية فرغلي عن استيائها من الفنان محمد رمضان بسبب عدم سؤاله عنها خلال مرضها على الرغم من دعمها له في بداياته الفنية.
وقالت حورية فرغلي في لقائها مع الإعلامي د. عمرو الليثي في برنامجه «واحد من الناس» على شاشة «الحياة»: «من ضمن الناس اللي استغربتها وأنا مش بشحت السؤال، محمد رمضان، في عبده موتة هو اللي كلمني وطلب مني أبقى بطلة قدامه علشان كان لسه وجه جديد، وعملت الفيلم ده وقلب الأسد والمصحف الشريف ما أخدتش مليم، وفاتت الأيام، وكان بيصور الأسطورة وأنا كنت بصور طلق صناعي وكنا في نفس اللوكيشن وبيني وبينه باب، وعرف إني موجودة، وحاولت أروح له قالولي بيغيّر قلت لهم عاوزة أسلم عليه».
وأوضحت أنها لم تأخذ مقابل أعمالها معه بسبب: «كنت عاوزه أساعده وهو كان عاوز حد معاه، فقلت له ده كادور مني، والمرة التانية معرفتش أتكلم في الموضوع»، موجهة له رسالة: «أقول له إيه يعني كفاية اللي هو فيه».
وعادت حورية فرغلي مؤخرًا من رحلة علاجية بالولايات المتحدة الأمريكية أجرت خلالها 4 عمليات جراحية في أنفها، لاستعادة شكلها ووظائفها مرة أخرى.
وأوضحت في تصريحات تليفزيونية: «صوتي مبقاش مخنف، لسه وجهي متورما قليلا، لكن بدأت أشم دلوقت ريحة الأكل والبارفانات»، مشيرة إلى عودتها مرة أخرى للولايات المتحدة في أغسطس المقبل للاطمئنان على حالة أنفها بعد الجراحات.
وعن رحلة علاجها، أوضحت حورية: «الإصابة بدأت منذ 9 سنوات، كنت في منتخب مصر للفروسية، والحصان وقع فوقي وكسرلي مناخيري تمامًا».
وتابعت: «رحلة علاجي مرت على بلاد كتيرة أوي، زي فرنسا والنمسا وبريطانيا والسويد والدنمارك وغيرها، وكنت فاكرة الموضوع في الأول بوظلي شكلي فقط، لكن مبقتش كمان عارفة أتذوق أي حاجة ولا أشم أي حاجة، وقعدت سنتين على الحال ده».
وأضافت: «روحت بعد كده أمريكا واتقالي إن عمليتي صعبة جدا من كتر العمليات اللي عملتها، كنت عملت 11 عملية قبل ما أروح أمريكا، وكتر العمليات طبعا بوظت الدنيا أكتر، الدكتور قالي لازم تقعد معايا هنا 4 شهور لأني عملت العملية على 4 مرات والحمد لله بقيت بخير».
مواضيع ممكن تعجبك
