تحدثت الفنانة آمال ماهر في مداخلة هاتفية لبرنامج «أسرار النجوم» مع إنجي علي على «نجوم إف.إم» في حلقة خاصة عن الفنان الراحل هاني شاكر.
وقالت الفنانة آمال ماهر خلال مداخلتها الهاتفية: «لحد دلوقتي مش مصدقة، ومخي مش قادر يستوعب رحيل هاني شاكر، فيه بني آدمين بتحسي إنهم مش وش موت، وضحكتهم بتديكي أمل في الحياة، ومجرد ما تتكلمي معاهم تحسي إن الدنيا لسه فيها أمل».
وأضافت: «قدّمنا مع بعض دويتو (ذكرياتنا)، وكنا بنتقابل بشكل يومي وقت التحضيرات، وكان دمه خفيف جدًا ودايمًا يطلعني بره ضغط الشغل، وكان يقولي: «أنتي موهبة عظيمة وصوت صعب يتكرر، حافظي على صوتك والنعمة اللي ربنا إداهالك)».
وتابعت حديثها عن دعمه لها قائلة: «كان من أكتر الناس اللي شجعت صوتي وموهبتي، وبالنسبة لي كان حد من عيلتي، مش مجرد فنان».
كما أشادت بأخلاقه وعلاقته بالجميع، وقالت: «كان متفاني جدًا في شغله، ومعندوش أي ضغينة تجاه حد، وعمره ما اتخانق مع حد أو قلل من أي شخص».
وأضافت: «كنا بنتكلم في التليفون دايمًا، وكان بيتطمن عليا من وقت للتاني، وكان بيعتبرني بنته أو أخت صغيرة ليه».
وعن تأثيره الفني والإنساني، قالت: «هو هيفضل موجود بأثره، وإحنا كفنانين لازم نتعلم منه، اتعلمت منه إن النجاح ممكن يبقى سهل، لكن الأصعب إنك تستمر بنفس القيمة، وهو فضل موجود بقيمته قبل فنه».
واستعادت ذكرياتها الأولى معه، قائلة: «أول بداياتي كانت مع الفنانة نجاة والفنان هاني شاكر في حفلات 6 أكتوبر، وكان عندي وقتها 13 سنة، وكان بيشجعني ويقولي أقف إزاي قدام المايك».
واختتمت قائلة: «صوته كان متمكن بشكل مدهش، ومفيهوش أي غلطة، وفضل محافظ على نفس الأداء والقوة كأنه لسه في سن الـ30 حتى وهو في السبعين».
*صورة من الصفحة الرسمية للفنانة آمال ماهر على «فيسبوك»
مواضيع ممكن تعجبك
أحدث الأخبار
