استضاف يوسف التهامي وفانا إمام في حلقة اليوم الثلاثاء من «عيش صباحك» على «نجوم إف.إم»، مها شوقي رئيس قطاع الخدمات والعمليات ورئيس المكتب الإداري بشركة «متلايف مصر».
وقالت مها شوقي رئيس قطاع الخدمات والعمليات ورئيس المكتب الإداري بشركة «متلايف مصر» إن أي شخص يمر بتحديات في عمله سواء كان رجلًا أو امرأة، مؤكدة: «بس المهم إنك تكوني حاطة هدف بتحاولي توصلي له، وأنا شخصيًا بختار أهداف صغيرة أوصل لهدف وأشوف اللي بعده وده بيسهل لي الوصول للأهداف ودايمًا يكون فيه مرونة إني أقدر أتكيف مع الوضع اللي أنا فيه ومهم إن الواحد يكون شغال في مكان بيسمح بده وإننا نتعلم من أخطائنا وده موجود عندنا في متلايف».
وتحدثت عن ما يتطلبه الأمر لوصول المرأة لمنصب قيادي، موضحة: «وصول المرأة لمنصب قيادي بيحتاج إنها تصدق اللي بتعمله واللي عاوزة توصل له، وإن الإنسان يتقبل إن مش كل حاجة هتكون تمام طول الوقت وساعات الشغل هيطغى على البيت وساعات البيت هيطغى على الشغل فبالراحة على نفسنا وكله هيكون تمام، خصوصًا إن المجتمع مركز أكتر مع الستات وبيبقى متوقع منها تكون كويسة في بيتها وفي شغلها وكل ده بيبني ضغوطات على الست وبيخليها ساعات مش قادرة وحاسة إن الدنيا صعبة شوية لكن مهم ناخد المواضيع ببساطة ونكون رحماء بنفسنا شوية».
القمة الدولية للمرأة
وتطرقت مها شوقي رئيس قطاع الخدمات والعمليات في «متلايف مصر» عن مشاركتها في القمة الدولية السابعة للمرأة – International Women Summit، موضحة أهم محاور الكلمة التي ستلقيها خلال جلسات القمة، وقالت: «هتكلم في القمة عن المسئولية والذكاء العاطفي وإني أولًا لازم أبقى فاهمة نفسي لأن لو ده مش عندي مش هعرف أتعامل مع الناس كويس، وبعد كده مهم أوي أفهم فريق العمل لأنه هو اللي بيعمل النجاح، وفهم ذاتي بيخليني أفهم الفريق بتاعي أكتر وبيقوي التواصل والثقة بيننا، وأصعب حاجة إن الواحد يبقى فاهم نفسه وإن الواحد يتقبل إن عنده حاجات مش مظبوطة أو محتاج يشتغل عليها».
وأشارت إلى أن: «القيادة بها ضغط وإرهاق ذهني لكن الموضوع محتاج تعود وممارسة ومحدش بيبدأ مدير شاطر لكن أكيد اتعلمت كتير ولسه بتعلم، بس طبيعي الضغط يكون موجود لكن بعد فترة بتقدر تتعامل معاه».
صفات المدير الناجح
وأوضحت أبرز صفات المدير الناجح، وهي: «محتاج يصدق إنه هيعرف يبقى مدير شاطر، ويبقى عارف هو ليه عاوز يكون مدير هل هيعرف يضيف حاجة أو يطور من إمكانيات الفريق ولا عاوز يكون مدير علشان يتقال عليه مدير فقط».
وأكدت أن مفهوم القيادة القوية يعني «إني أقدر أوصل لأهداف الشركة وأطور قدرات الفريق اللي معايا، وفي الآخر كل واحد له طريقته»، مضيفة أن «الثقة والشفافية أساس أي علاقة فالفريق لو مش واثق فيا وأنا واثقة فيهم مش هنعرف نتعامل مع بعض، كمان تحديد الأولويات مهم».
وأشارت مها شوقي رئيس المكتب الإداري بشركة «متلايف مصر» إلى أصعب فترات حياتها العملية، وقالت: «كانت فترة صعبة لما اتجوزت وخلفت وخفت ما أرجعش قوية في الشغل تاني، لكن كان حواليا داعمين من عيلتي وأصدقائي».
ولفتت إلى مهارة هامة وهي قدرة الموظف على إبراز جودة عمله، وقالت: «لو أنت بتشتغل كويس وساكت فأنا هكافئك على شغلك الكويس لكن علشان تتقدم لازم تقول وتوضح ده، لأن محدش هيتوقع إن حد هييجي ياخده من إيده ويقول له أنا هعملك كذا وكذا، لأن ممكن الموظف شايف في نفسه حاجة ما فالمدير يقول له أنا شايفك هنا أفضل أو في حاجة تانية، ولازم يبقى عنده مهارة إزاي تبين شغلك ودي مش حاجة وحشة، لأن هو كده كده مسئول إنه يتكلم برده عن شغل التيم بتاعه».
تمكين المرأة
وأكدت أن «تمكين المرأة بقى توجه دولة يمكن لسه في البداية لكن ده كان واضح الفترة اللي فاتت، وأنا محظوظة إني بشتغل في مكان هدف من أهدافه تمكين المرأة، والمرأة بتمر بظروف غير الراجل لأنها بتخلف ومسئولة عن البيت وتمكين المرأة مش إنك تدي المرأة حاجة مش حقها لكن إنك توفر لها البيئة المناسبة ليها ولظروفها علشان تطلع أحسن ما عندها».
مواضيع ممكن تعجبك
أحدث الأخبار