تامر نبيل لـ«أسرار النجوم»: فيلم «الست» قدم مستوى مختلف في الصناعة.. و«القصبجي» عبقري

استضافت إنجي علي في حلقة اليوم من «أسرار النجوم» على «نجوم إف.إم» الفنان تامر نبيل، للحديث عن مشواره الفني وأحدث أعماله الفنية.

البدايات

وتحدث الفنان تامر نبيل عن بدايات حلمه بالتمثيل وقال: «من وأنا صغير في سن 8 سنين بدأت تجارب تمثيلي في برامج الأطفال للتلفزيون مع أستاذ نور الدمرداش وأستاذة زوزو نبيل ومن وقتها الموضوع بقى بالنسبة لي شغف وفي المرحلة الثانوية اشتركت في مسرح المدرسة ثم إلى مسرح الجامعة، ثم ورش تمثيلية في مسارح الدولة إلى جانب الجامعة، وأنا محظوظ في الناس اللي قابلتها والأساتذة الكبار اللي قابلتهم في بداية الشغف وفهمت منهم الصناعة كلها مش بس التمثيل»، مضيفًا «وأنا صغير كنت متأثر كتير بالأفلام الأبيض والأسود والأفلام الهندي مع جيلي، لكن من الصناع اللي اتأثرت بيهم الأساتذة عاطف الطيب وأحمد زكي ونور الشريف ومحمود عبد العزيز وتاريخنا مليان أساتذة كبار».

الملهمين

وعن الملهمين في مشواره قال: «أكتر حد حسسني إن اللي عندي حقيقي وينفع يبقى بجد كان المخرج أستاذ محمد ياسين، شافني على المسرح وكلمني بعدها واهتم بيا وقال لي كلام مهم»، كما أضاف: «كمان اشتغلت 4 أعمال مع أستاذ مروان حامد، واللي حسيته إنه في البداية كان شايف حاجة فيا ثم بقى فيه ثقة ثم بقى بيعتمد عليا في حاجات كتير، وده بيديني ثقة وحافز إني أجيب آخر العداد»، ثم تطرق إلى اعتزازه بتقديم 3 أعمال للكاتب الكبير الراحل وحيد حامد وقال: «أستاذ وحيد حامد قدمت 3 أعمال من كتابته وهو شكرني في مكالمة بعد مسلسل (الجماعة 2) بعد دور حواش، وأنا بحب له (البريء) و(اللعب مع الكبار)».

فيلم الست

كما تحدث عن تجربته في فيلم «الست» بطولة منى زكي وتقديمه لدور «القصبجي»، وقال: «أي دور بيسنده ليا أستاذ مروان حامد باخد التحدي لأنه بيقدم سينما مختلفة واللي شاف الفيلم شاف أد إيه هو قدم مستوى مختلف في الصناعة بتاعتنا بعيدًا عن رأي الجمهور في الفيلم نفسه، وأنا كنت بحس إن شخصية القصبجي عبقري لكنه كتوم، وعنده عقلية مختلفة، واللي كان مركز فيه أستاذ مروان معانا إننا مش عاوزين نقلد الشخصيات لكن بنحاول نقدم روح الشخصية، ودي كانت أول تجربة مع أستاذة منى زكي وهي أنسانة خطيرة وفنانة شغوفة جدًا».