«عيش صباحك»| إيرينا يسري: ترشحت لـ«كلهم بيحبوا مودي» بعد 3 أيام من تتويجي بلقب ملكة جمال مصر

استضافت فانا إمام في حلقة الثلاثاء من «عيش صباحك» على «نجوم إف.إم»، طبيبة الأسنان وملكة جمال مصر 2025 – 2026 إيرينا يسري.

وتحدثت «إيرينا» عن تفاصيل المسابقة وتقدمها للمشاركة وقالت: «من زمان نفسي أقدم في المسابقة وأقول ليه ما أبقاش ملكة جمال مصر، وأيام الجامعة والدراسة ما كانش عندي وقت وكنت خايفة ده يأثر على ده ولما خلصت دراسة واشتغلت قدمت كذا مرة بس كنت بتشغل في الشغل والدراسة لحد ما قلت إني المرة دي هقدم وأكمل والحمد لله»، مشيرة إلى أهم معايير المنافسة والفوز في المسابقة وهي: «المستوى التعليمي واللباقة وحسن التصرف والاهتمام بالنشاطات المجتمعية».

وتابعت: «المسابقة كانت حوالي شهرين، كان فيه أكتر من حاجة من مواهب واللياقة البدنية وأسئلة ثقافية ومعلومات عامة، وأنا قدمت مونولوج مسرحي بالعربية الفصحى من شخصية السيدة زليخة في قصة سيدنا يوسف وأنا مهتمة وبحب التمثيل من زمان في مسرح المدرسة والجامعة».

وأوضحت ان المسابقة كانت بابًا لدخولها عالم التمثيل الذي تمارسه كهواية منذ الدراسة وقالت: «بعد التتويج بـ3 أيام اتعرض عليا دور في مسلسل (كلهم بيحبوا مودي) خاصة بعد ما قدمت عرض تمثيلي خلال المسابقة».

وقالت إيرينا يسري: «اتبسطت وكنت خايفة جدًا لأن أنا كنت بمثل مسرح وعمري ما وقفت في لوكيشن تصوير، لكن لما قعدت مع فريق العمل أول يوم تصوير اتطمنت ومع كلمة أكشن لقيت نفسي عادي كأن مفيش كاميرا أصلًا»، مؤكدة: «الحاجة المشتركة بين شخصيتي في الحقيقة والمسلسل إني كنت في العمل ملكة جمال مصر برده، ولقيت ردود فعل بعد أول حلقة من العمل».

وعن مستقبلها والعروض الفنية في عالم التمثيل بعد أول عمل، قالت: «جالي 3 عروض تمثيلية بعد المسلسل منهم بطولة جماعية لكن لما قريت الشخصية ما عجبنيش الدور وحسيته مش مناسبني ومش هعمله بحب واقتناع وأنا قلت أنا مش هحرق نفسي وأنا بحب أنتقي الأدوار، لكن لسه لحد دلوقت مفيش تعاقد رسمي على حاجة معينة».

وأضافت: «نفسي أعمل دور بنت ريفية أو صعيدية وأنا جربت الشخصيات دي في الورش اللي باخدها وعلى المسرح ونفسي أقدم شخصية والناس تقول مستحيل دي إيرينا أكيد دي حد تاني»، مشيرة إلى أنها تتمنى تقديم قضية الغارمات في عمل فني، موضحة: «لأن الغارمة ممكن تبقى أم وفاتحة بيت وبتجوز بنتها مثلًا وحصل لها ده فدي قضية مهمة جدًا نفسي أناقشها في عمل فني».

وأكدت إيرينا يسري إلى أنها تمارس التمثيل كهواية وإذا خُيرت بينه وبين ممارستها للطب ستختار مجال عملها ودراستها وهو الطب، موضحة: «أنا باخد ورش تمثيل ودي حاجة مش علشان أكمل في التمثيل بالضرورة لكن كهواية وحاجة بتريحني نفسيا ولأن التمثيل بالنسبة لي لحد دلوقت هواية جنب شغلي الأساسي الطب».