جيدا منصور لـ«عيش صباحك»: مسلسل «أندر إيدج» قريب للواقع.. وردود فعل الشارع أصدق من السوشيال ميديا

استضاف يوسف التهامي وفانا إمام في حلقة جديدة من «عيش صباحك» على «نجوم إف.إم»، الفنانة جيدا منصور، للحديث عن أحدث أعمالها الفنية، وكواليس مشاركتها في مسلسل «أندر إيدج».

«أندر إيدج»

وتحدثت جيدا منصور عن مسلسل «أندر إيدج»، وقالت: «لما جالي دوري في مسلسل أندر إيدج ما كانش النص اكتمل، فكان عندي أسئلة كتير عن الشخصية، ومع الوقت عرفت تفاصيل وعمق الشخصية أكتر، وحسيتها مختلفة عن أعمالي السابقة، وبتتكلم عن نوع معين من الجيل الحالي، وهي حاجة مفيش تركيز عليها في أعمال تانية، فكانت فرصة نعرف الناس مشاكل الجيل ده والحاجات اللي بيتعرض لها».

وأضافت أن أحداث المسلسل قريبة جدًا من الواقع، قائلة: «المسلسل مفيهوش مبالغة مقارنة بالواقع، بالعكس وإحنا بنصور كان فيه أخبار عن وقائع حقيقية قريبة جدًا من أحداث المسلسل، والأحداث دي موجودة لكن أعتقد إحنا ما بنتكلمش عنها».

وأشارت إلى أن اهتمامات الجيل الحالي ومشكلاته تختلف عن الأجيال السابقة، موضحة: «أكتر القضايا اللي بيناقشها المسلسل ممكن نلخصها في مشاكل العيلة والتربية وتعامل الآباء مع الطفل، وده بيكون نتيجته تعامل الأبناء مع المجتمع بعد كده».

التحضير للدور

وكشفت جيدا منصور عن استعدادها للشخصية، وقالت: «كان عندي شهرين علشان أتمرن على التزلج علشان الشخصية بتلعب  Skating، لكن لولا الدور ما كنتش هحب أتعلمه، لكن مثلًا نفسي أعمل دور عازفة ساكسفون علشان أتعلمه».

وأكدت أنها تحرص على اختيار أعمالها بعناية، مضيفة: «بحاول أختار العمل اللي أمثل فيه، مش مجرد لغرض الانتشار».

ورش التمثيل للأطفال

وتحدثت عن تجربتها في تقديم ورش تمثيل للأطفال والمراهقين، وقالت: «أنا حاليًا بدي ورش للأطفال والمراهقين، والأصعب إنك تدي المعلومة لحد من لما تحاول أنت تاخد المعلومة».

وعن الفرق بين أدوار الأطفال في الأعمال الفنية حاليًا عن الوقت السابق، قالت: «حاليًا الأطفال بقي عندهم وعي بالمشاعر اللي بيقدموها، فبيقدروا يمثلوا، زائد التوجيه اللي بقي موجود والورش المخصصة للأطفال، مع الإتاحة لأدوار أطفال فيها مساحات أكتر من كونه مجرد طفل في المشهد، زي علي البيلي في مسلسل (لام شمسية) اللي كان العمل بيدور حواليه».

كما أوضحت أن أكبر تحدٍ في تدريب الأطفال هو الفصل بين الشخصية وحياتهم، قائلة: «أصعب حاجة في تعليم التمثيل للأطفال والمراهقين إنهم بياخدوا كل حاجة بشكل شخصي.. فأكتر حاجة بحاول أعلمهالهم إنهم يفصلوا بين التمثيل وحياتهم الشخصية».

منة شلبي

وكشفت جيدا منصور عن شخصية كانت تتمنى تقديمها، وقالت: «كان نفسي أعمل دور منة شلبي في فيلم (هي فوضى)، لأني شوفته وأنا صغيرة، وكان فيه مشاعر وبتمر بحاجات كتير، فحسيت إني عاوزة أمثل الحاجات دي».

ردود الأفعال

وأكدت أنها تعتبر ردود فعل الجمهور في الشارع هي المقياس الحقيقي للنجاح، وقالت: «ردود فعل الشارع بحسها أصدق من السوشيال ميديا، لأن الشخص اللي هياخد من وقته وهييجي يتكلم معايا في الواقع أصدق من إنه يكتب كومنت من ورا شاشة».

رسالة للأهل

ووجهت جيدا منصور رسالة إلى أولياء الأمور، مستوحاة من الرسائل التي يناقشها مسلسل «أندر إيدج»، وقالت: «اسمعوا لأولادكم وابنوا مساحة آمنة إنهم يقدروا يتكلموا، ومش معنى كده إنك هتوافق على أي حاجة هيقولوها، لكن اسمع وأديهم النصيحة، وهم في يوم هيفهموا ده».

وفي ختام حديثها، كشفت أنها تمر بمرحلة جديدة في مشوارها الفني، وقالت: «الفترة دي نقلة معينة في مشواري، وفيه كذا مشروع قدامي، لكن مستنية أعرف ردود الأفعال على دوري في (أندر إيدج) لحد نهايته علشان أقرر».