شريف الشعشاعي لـ«عيش صباحك»: «إن شاء الله فيه جزء جديد من المداح.. وأكتر ناقد للفنان هو نفسه»

استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنان شريف الشعشاعي للحديث عن أحدث أعماله الفنية.

وتحدث الفنان شريف الشعشاعي عن مشاركته في الجزء السادس من مسلسل «المداح» في رمضان الماضي، وقلال: «المداح كده كده تجربة قائمة وكنت بسمع آراء زملاء عن أجواء العمل والتصوير وكنت متحمس أشوف هم بيعيشوا إيه وكنت قلقان برده لأنه براند وجمهوره ثابت ومستنيينه، وإزاي تعمل حاجة تسمّع جوه العمل الناجح ده فكان فيه تحدي وانبسطت بيه أوي».

وتابع: «كنت بتفرج عالمداح علشان الحالة والنوعية دي من الأعمال مش موجودة، مع إني ما كنتش من هواة النوعية دي من الاعمال لكن بدأت أتابع وأتحمس، وحمادة هلال شخص جميل جدًا، وحابب أذكر مشهد كنا بنسلم على بعض وهو بيشوفني في نبوءة في دماغه، ففي مرة هو ماسك إيدي وفضل ماسكها وكان بيقرا أذكار وقال لي أنت اترعشت وأنا بجد اترعشت وقال لي يا شريف أنت محسود، قلت له أنت شكلك مداح بجد».

كما تطرق للشخصية التي قدمها في العمل وقال: «برامج المراهنات دي حاجة خطيرة جدًا وفيه شباب في مصر وبره فيه بيضيعوا فلوسهم على ده، فأنا أول ما عرفت إن دوري بيوجه في الحتة دي تحمست إني أوعي الناس، والدوافع اللي بشوفها للشخصية شدتني جدًا إن شخص والده معاه فلوس لكن اتجه للمراهنات بسبب قلة التوعية والحماس اللي خلاه يضيع حتى نجاح أهله.. وأنا انبسطت جدا بالشغل مع الأستاذين فتحي عبد الوهاب وحمادة هلال».

كما حسم الفنان شريف الشعشاعي الجدل حول وجود جزء جديد من مسلسل «المداح» وقال: «إن شاء الله لسه فيه جزء جديد وإن شاء الله هكون موجود فيه».

وعن الاختيار بين حجم الدور وتأثيره، قال: «أنا بيبقى فارق معايا شكل الدور وتأثيره وفريق العمل اللي في العمل، وده كان سبب مشاركتي كضيف شرف في مسلسل الكينج مع الفنان محمد إمام واللي كانت مشاهدي معاه وأنا بحبه جدًا وهو شخص محترم، وداعم بشكل غير طبيعي».

وأكد: «أكتر ناقد للفنان هو نفسه والفنان اللي بيحب نفسه وبيمدح في نفسه خلاص ضاع وده بيفرق عن إنك تنبسط بنجاحك لأن ده طبيعي» مضيفًا «عاوز أعمل رومانسي كوميدي وكمان ابن البلد الشعبي، وأنا بالنسبة لي لسه في سنة أولى في مشواري لحد ما أحس إن كل بيت مصري عارف أنا مين، وكان عندي فرص إني أنتشر أكتر لكن أنا يهمني الدور وإنه يضيف لي».

وكشف شريف الشعشاعي عن تحضيره لعمل سينمائي جديد خلال الفترة المقبلة ما زال تحت التحضير.