يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنانة ياسمين رئيس، في الحلقة الـ13 من البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات ياسمين رئيس:
صحيتي من النوم لقيتي عقلك سايب رسالة بيقولك «زهقت منك وهسيبك وإوعي تدوري عليّا.. هتعملي إيه»؟
حلو قوي ومش هدور عليه
من غير عقلك أول حاجة تعمليها؟
هعمل كل اللي نفسي أعمله ومكسوفة منه عشان أنا بنت
عقلك سابق عمرك؟
أه
تحبي تقرأي عقل مين؟
ابني.. نفسي أعرف كل حاجة هو بيحب يفكر فيها
تعملي إيه لو كنتي الشخصية الوحيدة العاقلة في العالم؟
هحكم العالم
فكرة بتخافي منها؟
عمليات التجميل.. عايزة أزرع شعر وأزود وزني ثم أعمل نحت
سؤال لا تجدي إجابة عليه؟
ليه؟
ورقة تتمني تستعيدي ذكرياتك معاها؟
شهادة ميلادي
في معاهدة سلام بين عقلك وقلبك؟
بيتخانقوا.. لكن القلب بيكسب
زر التجاهل تستخدميه امتى؟
خلال التصوير لأتجاهل العبث اللي بيحصل في اللوكيشن
رأيك في مثل «عقله في رأسه يعرف خلاصه»؟
لأ
ممكن متجرحيش حد؟
لساني بيغلف الكلام حتى لا يجرح أحد
جرح عقلك بيفكرك بيه؟
أكيد.. جرح الفراق
فكرة مجنونة مسيطرة عليكي؟
أبطل شغل
غلطة في حقك عقلك بيفكرك بيها؟
مفيش
مين واخد عقلك؟
ابني
ترسمي عقلك إزاي؟
وردة لونها وردي
أعقل شخصية قدمتيها في عمل فني؟
مفيش
شخصية جسدتيها شبهك؟
كل شخصية قدمتها فيها جزء شبه طريقة تفكيري
تحبي تقضي وقت مع شخصية قدمتيها؟
رؤى في فيلم «هيبتا» لأن فيها حاجات شبههي كتير
شخصية قدمتيها أثرت على طريقة تفكيرك؟
شخصية «غزالة» في مسلسل «اسأل روحك» تؤثر على طريقة تفكيري لأن بها أشياء كثيرة لها علاقة بالروحانيات، لذا فهي بتؤثر عليّ.
تعرفي تتعاملي مع شخص عقله صغير؟
باخده على قد عقله
أهم سمات عقل برج العذراء؟
الانتقاد
تعرفي تشتري دماغك؟
لأ
تحبي تستلفي عقل مين؟
مادونا.. لأنها فنانة ذكية وتمتلك فكرا
شعار العيد القومي للعقل؟
إديني عقلك
تم حجزك في مستشفى مجانين «نجوم إف إم».. مين تحبي يكون في الغرفة اللي جنبك؟
دينا الشربيني
خلاصة حكمتك مع الحياة؟
اوعى تسيب عقلك لأي شخص
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار