يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنانة هندي صبري، في الحلقة الـ23 من البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات هند صبري:
صحيتي من النوم لقيتي عقلك سايب رسالة بيقولك «زهقت منك وهسيبك وإوعى تدور عليّا.. هتعملي إيه»؟
ياريت
عقلك يسبق سنك؟
أه عقلي سابق سني
هل السكات أذكى من الكلام؟
طبعًا السكات أذكى وأضمن وأعقل وأرقى
إذا اقتضت الظروف تتعاملي مع شخص عقله صغير.. تعملي إيه؟
باخده على قد عقله
قرار في حياتك فخورة باستخدام عقلك؟
صداقات كان ممكن توديني في مشكلة لكن وقفتها
في قرار خدتيه بقلبك لكن عقلك صححه؟
لأ
تحبي تقرأي عقل مين؟
شريهان
بتخسري الناس بسهولة؟
على حسب الموقف
في جرح لسه فاكراه؟
لأ.. أنا معنديش ذاكرة كويسة وبنسى
عادة تكرهيها في هند؟
الاستعجال
لو الإنسانة الوحيدة العاقلة في العالم.. تعملي إيه؟
حاجة مش حلوة.. وهعوز أكون مجنونة
تشيلي إيه من دماغك؟
التوتر والشك والتفكير الزائد
مين واخد عقلك؟
بناتي
ترسمي عقلك إزاي؟
شخبطة
في حد بيقولك اعقلي يا هند؟
لأ مفيش
هل زارتك فكرة مجنونة؟
في الشغل أوقات بدخل حاجات قبل ما أحسبها لكن عقلي بيوقفني
فكرة بتخافي منها؟
كل ما يتعلق بمستقبل بناتي
أخبار مواليد برج العقرب؟
عندهم ذكاء وصمود
مين عقله أكبر.. أنتي أم زوجك؟
زوجي
مين يجنن التاني.. الست أم الراجل؟
الست طبعا
بتعرفي تكبري دماغك؟
بتعلم
أكثر شخصية مجنونة قدمتيها؟
لوليا في فيلم «الفيل الأزرق»
شخصية جسدتيها كانت تشبه طريقة تفكيرك؟
علا في مسلسل «البحث عن علا»
هل في شخصية رفضتيها لأن عقلك قال لأ؟
طبعًا
مشهد قلتي بعده أنا مجنونة؟
كل مشاهدي في «الفيل الأزرق»
من خذلك.. عقلك أم إحساسك؟
عقلي.. لأن الإحساس لا يخذل
تحبي تستلفي عقل مين؟
ميريل ستريب لتاريخها الفني الكبير
سؤال تخافي تسأليه لنفسك؟
هل أنا في المكان المناسب في الوقت المناسب؟
ممكن متجرحيش حد؟
بحاول أجبر الخواطر على قد ما أقدر
تاخدي دواء يمنع التفكير؟
أه أكيد
اوصفي عقلك في جملة؟
العقل ده هيجنني
تعيدي يوم إيه في حياتك؟
ولادة بناتي
مين معاه مفتاح مخك الاحتياطي؟
زوجي
تم حجزك في مستشفى مجانين «نجوم إف إم».. مين تحبي يكون في الغرفة اللي جنبك؟
منة شلبي
خلاصة حكمتك مع الحياة؟
متفكرش كتير.. لأن محدش هيكمل في الحياة طول العمر
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار