«قبل ما تفطر بكتير»| كريم قاسم عن دوره في «منّاعة»: «كنت خايف من تقديم الشخصية.. واتعلمت من هند صبري كتير»

استضاف محمد عبد الوهاب وملك شديد في حلقة اليوم من «قبل ما تفطر بكتير» على «نجوم إف.إم» الفنان كريم قاسم للحديث عن أحدث أعماله، مسلسل «منّاعة» الذي عُرض في النصف الأول من شهر رمضان المبارك.

منّاعة

وتحدث الفنان كريم قاسم عن دور المخرج حسين المنباوي في مساعدته على تقديم دوره بالشكل المطلوب، وقال: «أستاذ حسين المنباوي من المخرجين اللي بيسمعوا، ولو أنا شايف أي مشكلة أو تفصيلة بقول له، وهو شخص هادي ورايق ممكن يتعصب مرة واحدة خلال اليوم، وأنا ما كنتش عارف هعمل الشخصية إزاي وخايف أعملها وحش لكنه جه قال لي الموضوع بسيط وسهل، وهو عنده مذهب في الحياة إن مفيش حاجة ما بتتحلش».

وتابع: «هو سهّل لي تقديم شخصية (منعم) بشكل كبير، والتحول اللي حصل في الشخصية هو ساعدني إن الموضوع يبقى بسيط، وهو كان دايمًا بيسمعني وبيقول لي قول عاوز تقول إيه، وتوجيهاته كانت في الجون جدًا».

كما تحدث عن تعاونه مع الفنانة هند صبري، قائلًا: «هند صبري لو قعدتي معاها تتكلمي في أي حاجة هتتعملي منها حاجة، وأنا اتعلمت منها كتير في الشغلانة والتعامل أهمها إنها بتعرف تعمل أكتر من حاجة في نفس الوقت بتركيز كبير».

أضعف خلقُه

كما تحدث عن مشاركته في فيلم الفنان أحمد حلمي الجديد «أضعف خلقه» الذي تشاكه فيه البطولة أيضًا الفنانة هند صبري، وقال: «الفنانة هند صبري كانت أختي في (مناعة) وهي مرات أخويا في الفيلم، وأنا بقدم دور أخو الفنان أحمد حلمي واسم الشخصية (عمرو) وهو دور مهم في الأحداث لكن مشاهده قليلة بعتبره ضيف شرف، والفيلم حصل فيه شوية تأجيلات، لحد ما بدأنا نصور في نوفمبر اللي فات ووقفنا علشان رمضان».

السينما والدراما

وعن مكانة السينما ودور العرض مقارنة بالدراما والمنصات حاليًا، قال الفنان كريم قاسم: «أنا ما بقتش قادر أتفرج على فيلم ساعتين مرة واحدة، فأنا أعتقد إن جذب السينما للناس حاليًا محتاج يكون موضوع الفيلم شاددهم جامد وفيه إبهار علشان حد ينزل من البيت يروح السينما، فأنا أعتقد الناس متعودة على فكرة الدراما الحلقة نص ساعة أو 40 دقيقة، وأنا أعتقد ده أكبر عدو لصناعة السينما عالميًا مش في مصر، لكن في نفس الوقت السينما المصرية مؤخرًا غنية جدًا بالنجوم والوجوه الجديدة، زي طه دسوقي وأحمد داش ومصطفى غريب وميشيل ميلاد، وأنا متفائل بالسينما المصرية جدًا لأن فيه أفلام حلوة وبتروح مهرحانات والموضوعات بقت غنية أكتر فأنا متفائل من ناحية الصناع والصناعة لكن متشائم بس من ناحية التكنولوجيا وتأثيرها عالسينما».

كريم عبد العزيز وأحمد عز

وتحدث كريم قاسم عن أدوار تمنى تقديمها في بداية مشواره ونجح في ذلك، موضحًا: «كنت أتمنى أعمل أخو كريم عبد العزيز أو أحمد عز، وفعلا عملت مسلسل (الهروب) مع كريم عبد العزيز في شخصية أخوه فعلًا، وبعدين (ولاد رزق) مع أحمد عز كنت أخوه في 3 أجزاء».

واختتم حديثه: «أنا حلمي من وأنا صغير إني أبقى ممثل بعمل أدوار كتيرة ومختلفة وأنا بفاجيء نفسي وبكسر التوقعات بيني وبين نفسي يعني عمري ما توقعت إني أعمل دور زي في (ولاد رزق) أو في (مناعة)».