يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنان عمرو يوسف، في الحلقة الـ18 من البرنامج، حيث وافق على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات عمرو يوسف:
صحيت من النوم لقيت عقلك سايب رسالة بيقولك «زهقت منك وهسيبك وإوعى تدور عليّا.. هتعمل إيه»؟
هحاول أدور على عقل أذكى
من غير عقلك نفسك تعمل إيه؟
بفكر لو أنا خالي من المسؤوليات.. أقعد على البحر
الجهل نعيم؟
طبعا والمعرفة عذاب
أول ملف تحب تقفله؟
الذكريات السيئة أو الأليمة
تعمل إيه لو كنت الإنسان الوحيد العاقل في العالم؟
هتجنن زيهم
بتاخد حقك بالعقل أم الدبلوماسية؟
بالعقل.. بحاول أكون دبلوماسي وعاقل في تصرفاتي
موقف نفسك تتجنن فيه؟
مواقف كثيرة بفكر في كده لكن المسؤوليات بتحجمني
بتتخيل حاجات ملهاش وجود؟
أحيانًا.. أنا بسرح بخيالي أوقات كتير جدًا
خيالك مبدع؟
أتمنى
تحب ترسم عقلك إزاي؟
ألغاز.. لأن مخي بيفكر بتأني شديد
مين بيجنن التاني.. الست أم الراجل؟
الست
أكثر شخصية مجنونة قدمتها على الشاشة؟
الشيخ طارق في مسلسل «نيران صديقة» بحبها لأن بها تناقضات كثيرة، بجانب شخصية «ربيع» في «ولاد رزق» لأنها في حتة تانية لوحدها.
في شبح بيطاردك؟
شبح الوقت
تحب تقضي يوم مع مين من شخصياتك الفنية؟
ربيع رزق في «ولاد رزق» لأن دمه خفيف
تحب تستلف عقل مين؟
توم هاردي لأني بحب تمثيله وطريقة تفكيره
بتكلم نفسك ساعات؟
بكلم نفسي كتير
سؤال جاوبته غلط في امتحان الحياة؟
أنا مبندمش
أكثر مخرج مجنون اشتغلت معاه؟
ولا واحد.. كلهم فنانين مهمين
ممكن تمارس مهنة الإخراج؟
طبعًا.. أنا في دماغي الإخراج وهسمع كلام عقلي لكن مش دلوقتي
تحب تعيد يوم إيه من حياتك؟
يوم فرحي
شعار العيد القومي للعقل؟
خرج ولم يعد
تاخد دواء يمنع التفكير؟
طبعًا
بتشحن بطارية عقلك إزاي؟
بالإجازة
لو في زر يحول شخص مجنون ليوم واحد.. تختار مين؟
أخويا الصغير
مين معاه مفتاح مخك الاحتياطي؟
مفيش
أوصف عقلك في جملة؟
كثير التفكير
تم حجزك في مستشفى مجانين «نجوم إف إم».. مين تحب يكون في الغرفة اللي جنبك؟
حسن الرداد وأحمد فهمي وأحمد حلمي وأحمد السقا
خلاصة حكمتك مع الحياة؟
مفيش حاجة اسمها حظ من دون مجهود
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار