يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنانة بشرى في الحلقة الـ29 من البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات بشرى:
صحيتي من النوم لقيتي عقلك سايب رسالة بيقولك «زهقت منك وهسيبك وإوعى تدور عليّا.. هتعملي إيه»؟
عنده حق.. هو تعب مني
عقلك سابق عمرك؟
بكتير وهو سبب معاناتي
سؤال محير عقلك ولا تجدي إجابة له؟
ليه الشر اللي في العالم ده كله؟
لو اضطرتك الظروف تتعاملي مع شخص عقله صغير.. تتصرفي إزاي؟
هنزل لمستواه
قرار كنتي فخورة باستخدامك عقلك قبل قلبك؟
جوازاتي العقلانية
قرار خدتيه بقلبك والعقل صححه؟
جوازة من الجوازات ومنصب من المناصب التي تركتها
بتخسري الناس بسهولة؟
أنا بستحمل زيادة عن اللزوم
عادة بتكرهيها في بشرى؟
لساني تاعبهم لكن مريحني
لو الإنسانة الوحيدة العاقلة في العالم وسط مجموعة مجانين.. تتصرفي إزاي؟
العقل بيقول أتجنن زيهم
أجن عاقلة أم أعقل مجنونة؟
الاتنين
تستخدمي زر التجاهل امتى؟
كل يوم
مين واخد عقلك؟
الوجود
ترسمي عقلك إزاي؟
متاهة
في حد بيقولك إعقلي يا بشرى؟
لأ
فكرة بتخافي منها؟
إني أهاجر
مميزات عقل برج الميزان؟
التوازن والإبداع
مين يجنن الآخر.. الست أم الراجل؟
الراجل
خدتي إيه من عقلك والدك الكاتب أحمد عبدالله؟
إني أكون محاربة
بتكبري دماغك؟
بعرف
أكثر شخصية مجنونة جسدتيها على الشاشة؟
لسه مجسدتش حتى الآن
شخصية قدمتيها وكانت تشبه طريقة تفكيرك؟
ولا شخصية حتى الآن
مشهد قلتي بعده «أنا مجنونة»؟
المشاهد التي لا يوجد فيها دوبلير وأعملها لوحدي
تختاري مين من شخصياتك الفنية تحبي تقضي معاها يوم؟
رحاب في فيلم «وش إجرام» بسبب خفة دمها
من خذلك.. عقلك أم إحساسك؟
العقل
تحبي تستلفي عقل مين؟
فيولا ديفيس لأني بحب اعتزازها بنفسها وموهبتها الكبيرة
تحبي تمسحي إيه من دماغك؟
كل الذكريات السلبية
ممكن متجرحيش حد؟
كتير بيحصل
شعار العيد القومي للعقل؟
ريح واستريح
مين معاه مفتاح مخك الاحتياطي؟
مفيش
تم حجزك في مستشفى مجانين «نجوم إف إم».. مين تحبي يكون في الغرفة اللي جنبك؟
الدكتور حازم الرفاعي
خلاصة حكمتك مع الحياة؟
خلي بالك من عقلك
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار