يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنانة إنجي المقدم، في الحلقة الـ26 من البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات إنجي المقدم:
صحيتي من النوم لقيتي عقلك سايب رسالة بيقولك «زهقت منك وهسيبك وإوعى تدور عليّا.. هتعملي إيه»؟
مش هدور عليه.. وهقوله: «أرجوك سيبني في حالي»
من غير عقلك تعملي إيه؟
أمشي بقلبي
بتثقي في عقلك؟
القلب أذكى
التمثيل لازم يكون فيه عقل ولا شوية جنون؟
جنون بسبب الإبداع
موقف فقدتي فيه عقلك؟
أنا مبفقدش عقلي
تحبي تستلفي عقل مين؟
ميريل ستريب.. ومنى زكي وفاتن حمامة
أجن مخرج اشتغلتي معاه؟
محمد سامي
أعقل مجنونة أم أجن عاقلة؟
أجن عاقلة
لون عقلك؟
أحمر
تحبي تمسحي إيه من عقلك؟
الماضي والمستقبل
تكوني مخرجة مجنونة أم مخرجة عاقلة؟
مش عايزة أكون مخرجة
تاخدي دواء يمنع التفكير؟
أه طبعا
أكتر حاجة مش عايزة تفكري فيها؟
مش عايزة حسابات
شعار العيد القومي للعقل؟
أين عقلي؟
لو في زر لتحويل أي شخص إلى مجنون.. تختاري مين؟
زوجي
مين يجنن التاني.. الراجل أم الست؟
الست
حاجة مجنونة نفسك تعمليها لكن مش قادرة؟
نفسي أنط من طيارة
في الحياة العاطفية.. عقلك بيمثلك إيه؟
موظف علاقات عامة بيصلح غلطات القلب
انفصال والدك ووالدتك.. مشهد واجهتيه بعقلك أم قلبك؟
عقلي
أوصفي عقلك في جملة؟
عنده فرط حركة
أعقل شخصية قدمتيها؟
صوفيا في مسلسل «ليالي أوجيني»
تم حجزك في مستشفى مجانين «نجوم إف إم».. مين تحبي يكون في الغرفة اللي جنبك؟
محمد ممدوح
خلاصة خبرتك مع الحياة؟
اعتزل ما يؤذيك
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار