يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنان أحمد فتحي، في الحلقة الـ25 من البرنامج، حيث وافق على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات أحمد فتحي:
صحيت من النوم لقيت عقلك سايب رسالة بيقولك «زهقت منك وهسيبك وإوعى تدور عليّا.. هتعمل إيه»؟
الرسالة دي لقيتها من زمان.. لكن عقلي هرب بسبب اللي بعمله فيه
أول حاجة تعملها بعيد عن عقلك؟
هدور على عقل غيره
أنضف عقل في الوسط الفني؟
الفنان نور الشريف كان متميز ويمتلك ثقافة واسعة
بتثق في عقلك دائما؟
بثق فيه لكن ساعات بكون متردد
أجن عاقل أم أعقل مجنون؟
مش عارف
شعار العيد القومي للعقل؟
اسمع كلامه وهاوده ساعات
فكرة مجنونة نفذتها؟
معظم أفكاري مجنونة
لو قدرت تسرق عقل فنان لمدة يوم واحد؟
خالد النبوي
لو قابلت خيالك في الشارع تعمل إيه؟
هعطف عليه وأقوله: «ربنا يصبرك»
لو في نسخة تانية منك تعمل إيه؟
هصدرها في الحاجات اللي مش عايز أعملها
مين أعقل مخرج اشتغلت معاه؟
رامي إمام
أجن مخرج؟
معتز التوني
هل في حياتك أشخاص قلت عليهم عقلهم صغير؟
أكيد في كتير
مين بيقولك اعقل يا أحمد؟
زوجتي
مين بيجنن التاني.. الراجل أم الست؟
الست
لو في زر لتحويل أي شخص لمجنون تجربه على مين؟
الفنان محمود حميدة
تم حجزك في مستشفى مجانين «نجوم إف إم».. مين تحب يكون في الغرفة اللي جنبك؟
الفنان مصطفى أبو سريع
ممكن تكلم نفسك؟
بيحصل أوقات
عندك أمل نادي الزمالك ميخيبش ظنك؟
معنديش أمل للأسف.. مفيش نادي بيحصل فيه كده
أكلة بتحبها وتفضل تاكل منها؟
الفول والطعمية
خلاصة حكمتك مع الحياة؟
حاول تسايس عقلك ولا تلغيه ولا تسمع كلامه
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار