يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنانة يسرا اللوزي في الحلقة السابعة من البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات يسرا اللوزي:
صحيتي من النوم لقيت عقلك سايب رسالة بيقولك «زهقت منك وهسيبك وإوعى تدوري عليّا.. هتعملي إيه»؟
هخش أنام تاني وأسيبه لأن محتاجة أخد استراحة منه
عقلك سابق عمرك؟
أه بكتير
رأيك في مثل «عقله في رأسه يعرف خلاصه»؟
مش دائما.. لأن القلب إحساسه بيكون صادق عن العقل
إذا اتعاملتي مع شخص عقله صغير.. بتعملي إيه؟
طول الوقت بتعامل معاهم وبنزل لعقلي معاهم
مين معاه مفتاح دماغك؟
أصحابي القريبين أو طبيبي النفسي
بتزوري دكتور نفسي؟
أه لأنه بيحاول يظبط دماغي بسبب كم الأفكار الكبيرة فيها
قرار في حياتك فخورة باستخدام عقلك قبل قلبك؟
عملية ابنتي دليلة وحسبتها بعقلي وليس قلبي
تحبي تقرأي عقل مين؟
زوجي حتى أفهمه
أكثر حاجة بتحبيها في عقل زوجك؟
المبادئ
مين يجنن التاني.. الست أم الرجل؟
الرجل
جرح عقلك بيفكرك بيه؟
فقدان الأهل
عادة بتكرهيها وعمرك ما غيرتيها؟
محاولة إرضاء الآخرين قبل نفسي
تعملي إيه لو كنتي الشخصية الوحيدة العاقلة في العالم؟
مش عارفة
أعقل مجنونة أم أجن عاقلة؟
أجن عاقلة
تشيلي إيه من دماغك.. التوتر أم الشك أو التفكير الزائد؟
التفكير الزائد
مين واخد عقلك؟
الأولاد
هل زارتك فكرة مجنونة من قبل؟
كنت عايزة أعمل شعري أحمر
لو عقلك عمل مذكرات.. عنوانها يكون إيه؟
ياما إرحميني
عقلك الصبح غير بالليل؟
الأفكار والأسئلة الوجودية بتكتر بالليل
أكثر شخصية مجنونة جسدتيها؟
فاطيما في مسلسل «الحلال»
أكثر شخصية تشبه طريقة تفكيرك؟
شيرين في مسلسل «الجماعة» الجزء الأول
شخصية رفضتيها رغم إغراء الدور وأهميته؟
أكيد في أدوار
شخصية تحبي تقضي معاها يوم؟
شيري في مسلسل «جميلة»
عقلك ممكن يكون شرير؟
بحاول أوقات أكون شريرة لكن مبقدرش
عقلك أم إحساسك.. من خذلك؟
عقلي
سؤال تخافي تسأليه لنفسك؟
امتى يكون عندك ثقة في نفسك
تحبي تستلفي عقل مين؟
الفنانة كيت ويلسون
لون عقلك إيه؟
أحمر
شعار العيد القومي للعقل؟
اسكت بالليل
تحبي تمسحي إيه من دماغك؟
الذكريات القديمة
لو في زر لتحويل أي شخص لمجنون تجربيه على مين؟
على نفسي
مين معاه مفتاح مخك الاحتياطي؟
زوجي
تعيدي يوم إيه في حياتك؟
يوم ولادة بناتي
تم حجزك في مستشفى مجانين «نجوم إف إم».. مين تحبي يكون في الغرفة اللي جنبك؟
الفنان أحمد الفيشاوي لأنه صريح ودمه خفيف
خلاصة خبرتك مع الحياة؟
أحسن استثمار لأولادنا إننا نقضي معاهم وقت
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار