يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين الفنانة ليلى علوي في أولى حلقات البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات ليلى علوي:
– صحيتي من النوم لقيتي عقلك سايب رسالة بيقولك «زهقت منك وهسيبك وإوعي تدوري عليّا.. هتعملي إيه»؟
هقوله مع ألف سلامة.. لأن نفسي أرتاح من مخي لأنه تاعبني وشغال على طول.
– هل عقلك يسبق عمرك؟
أه.. من وأنا صغيرة، البنات بيقولوا عنهم عقلهم سابق عمرهم، وبحكم مهنتي بحس إن عقلي سابق عمري في حاجات وطفل في أمور أخرى، وعلى قد ما عقلي بيفكر وبيوزن الأمور على قد ما في جزء حنين وطيب.
– عقلك الصبح غير عقلك بالليل؟
أكيد.. الصبح بيكون نشيط وبالليل بيكون في شوية كسل.
– مع النضج والخبرة.. هل العقل بيكون حذرًا أم أكثر جرأة؟
في أمور يكون حذرًا وأمور يكون أكثر جرأة.. لكنه يستطيع التمييز بينهما.
– العقل بيحمي الإنسان أكثر أم يحرمه من حاجات حلوة؟
لو بيحرمه من حاجات بتكون حلوة هي في النهاية حماية له سواء لصحته أو سلامته النفسية أو علاقاته مع الناس.
– إيه رأيك في مثل «عقله في رأسه يعرف خلاصه»؟
عنده حق.. لأن عقلي في رأسي.
– إذا اقتضت الظروف تتعاملي مع شخص عقله صغير.. بتعملي إيه؟
بمشي.. وبنزل لعقله لو في حاجة إفادة له.
– لما دماغك بتعطل بتلجأي لمين؟
أختي لأن عندها مفاتيح دماغي.
– قرار في حياتك فخورة باستخدامك عقلك قبل قلبك؟
معظم قراراتي بستخدم عقلي قبل قلبي.
– إذا كنتي خبيرة في قراءة العقول.. تحبي تقرأي عقل مين؟
أحب أقرأ عقل الفنانين: عادل إمام، ويحيى الفخراني، ويسرا.
– هل بتخسري الناس بسهولة ولا بتستحملي قبل ما تقفلي الباب؟
بستحمل قبل ما أقفل الباب.. لكن قفلت الباب كتير.
– لو سألت عقلك.. إيه العادة اللي بتكرهها في ليلى علوي ومغيرتهاش؟
بتفكر كتير.. وهي عادة وحشة.
– لو فجأة لقيتي نفسك الإنسانة الوحيدة العاقلة وسط مجموعة مجانين؟
هقول ياريتني كنت مجنونة.
– قرار محسوب أم مغامرة؟
قرار محسوب.
– صمت ذكي أم كلام صريح؟
صمت ذكي.
– نجاح سريع أم مستمر؟
نجاح مستمر.
– لو مسموح تشيلي «سِلكة واحدة» من دماغك؟
التفكير الزائد عن اللازم.
– مين بياخد عقل ليلى علوي معظم الوقت؟
أنا وما حولي.
– لو رسمتي عقلك هترسمي إيه؟
دوائر لا نهاية لها.
– في حد بيقولك «إعقلي يا ليلى»؟
أختي
– هل زارتك فكرة مجنونة وكنتِ هتنفذيها؟
أكيد.
– حاجة الناس فاكرينك شاطرة فيها والحقيقة عكس كده؟
التخطيط.. أنا ملتزمة ومجتهدة لكن مبعرفش أخطط وبوكل على الله.
– فكرة بتخافي منها؟
الأمان لنفسي وللي حواليا ولبلدي.
– أخبار عقل مواليد برج الجدي؟
حلو جدًا.
– عندك تحفظ وكتمان؟
جدًا.
– مشهد قلتي بعده «أنا مجنونة»؟
في فيلم «إنذار بالطاعة» وأصبت أثناء التصوير وتمت خياطة الجرح بجانب الوريد.
– هل هناك شخصية تشبه طريقة تفكيرك؟
شخصية ندى في فيلم «حب البنات».
– شخصية رفضتيها رغم إغراء الدور؟
موجودة لكن مش هكشف عنها.
– أكثر شخصية عملت دوشة في عقلك؟
التوأم، المغتصبون، وإيمانويلا في «المصير».
– شخصية تحبي تقضي معاها يوم؟
إيمانويلا في «المصير»، ندى في «حب البنات»، وهالة في «هالة والمستخبي».
– من خذلك.. عقلك أم إحساسك؟
إحساسي مخذلنيش وعقلي صايني.. الناس هي اللي بتخذل.
– لون عقلك إيه؟
رمادي وأزرق وأبيض وأبيض في أسود.
– لو تعملي عيد قومي للعقل؟
ابتسم من فضلك.. فليغرق العالم.
قدرتي تعملي معاهدة صلح بين عقلك وقلبك؟
مفيش اعتراض بين عقلي وقلبي.
– يوم تتمني ترجعيه في حياتك؟
يوم ولادة فرح وهنا وخالد وأحفادي.
– لو عقلك الآن أرسل برقية لعقلك في بداية المشوار.. هيقول إيه؟
ربنا معاك.
– إذا اضطرينا نحجزك في مستشفى مجانين «نجوم إف إم».. مين تحبي يكون في الغرفة اللي جنبك؟
طه دسوقي
– خلاصة خبرتك مع الحياة؟
حب لغيرك ما تحبه لنفسك.. وامشي عدل يحتار عدوك فيك.
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار