يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنانة فرح الزاهد، في الحلقة السادسة من البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات فرح الزاهد:
صحيتي من النوم لقيتي عقلك سايب رسالة بيقولك «زهقت منك وهسيبك وإوعي تدوري عليّا.. هتعملي إيه»؟
هسيبه لأني مبستخدموش كتير وهرتاح
بتسألي عقلك في إيه؟
الأمور الصعبة خاصة بأعمالي الفنية
تحبي تعملي إيه من غير عقلك؟
أنط من طيارة
رأيك في مثل «عقله في رأسه يعرف خلاصه»؟
حلو جدًا
إذا اتعاملتي مع شخص عقله صغير.. بتعملي إيه؟
أنا عقلي أصغر أكيد.. فبكون مبسوطة
بطارية عقلك بتتشحن بإيه؟
الأكل
أكله تخلي عقلك منور؟
بطاطس محمرة
هتعملي إيه لو في نسخة أخرى منك؟
هتكون صاحبتي
توافقي تقدمي دور مجنونة؟
جدًا.. وهذاكر الدور كويس
الجنون فنون أم الفنون جنون؟
الجنون ليس فنًا ولا الفنون جنون.. لا بد من وجود عقل
مين معاه مفتاح دماغك؟
شقيقاتي هنا ونور
قرار في حياتك فخورة باستخدام عقلك قبل قلبك؟
مفيش قرار خدته غير بقلبي وعقلي
تحبي تقرأي عقل مين؟
مفيش حد
في جرح عقلك دائمًا بيفكرك بيه؟
نعم.. لكن تلك الجروح كونت شخصيتي
تعملي إيه لو كنتي الشخصية الوحيدة العاقلة في العالم؟
هعالج الباقي كله
عادة تكرهيها في فرح؟
باكل كتير جدًا
مين بياخد عقلك؟
شغلي
لو قابلتي خيالك في الشارع هتاخديه بالحضن؟
هحضنه لأنه غلبان
مين أكتر شخص عاقل بحياتك؟
هنا الزاهد
حاجة الناس فاكرينك شاطرة فيها والحقيقة عكس كده؟
بحب أكون شاطرة في كل حاجة
أخبار عقل مواليد برج الجوزاء؟
متقلبو المزاج جدًا
لو زوجك اتجوز عليكي هتتصرفي بعقلك ولا بقلبك؟
في الأول هتصرف بقلبي.. ثم أفكر بعقلي
تستلفي عقل مين؟
نفسي أستلف موهبة عبلة كامل
لو رسمتي عقلك هيكون لونه إيه؟
وردي لأني بحب اللون
تاخدي دواء يخليكي متفكريش؟
لا طبعًا.. نموت لو مفكرناش
تحبي تمسحي إيه من دماغك؟
مفيش حاجة
بتكلمي نفسك؟
بكلم نفسي طول الوقت
لو تعملي عيد قومي للعقل.. شعاره؟
أحلى عقل ده ولا إيه؟
لو في زر لتحويل أي شخص لمجنون تجربيه على مين؟
على نفسي
في الحب.. نسبة العقل كام %؟
50% عقل و50% جنون
مين يجنن التاني.. الست أم الرجل؟
الراجل
رأيك في جنون السوشيال ميديا؟
صعب جدًا.. البعض يبحث عن الاستفزاز لجذب الانتباه
مشهد قلتي بعده «إيه الجمال ده»؟
عمري ما شفت نفسي جميلة قوي ودائمًا بشوف عيوبي
أكثر مشهد فني استنزفك؟
مشهد في مسلسل «لينك» مع الفنانة رانيا يوسف
مين معاه مفتاح احتياطي لمخك؟
نور شقيقتي
تم حجزك في مستشفى مجانين «نجوم إف إم».. مين تحبي يكون في الغرفة اللي جنبك؟
الفنان محمد فراج
خلاصة خبرتك مع الحياة؟
قبل ما تتكلم لازم كلامك يعدي على 3 محطات: هل هو حقيقي؟، هل هو مهم؟، هل هو طيب أم لأ؟
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار
