يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنانة سارة خليل في ثالث حلقات البرنامج، حيث وافقت على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات سارة خليل:
– صحيتي من النوم لقيتي عقلك سايب رسالة بيقولك: «زهقت منك وهسيبك وإوعي تدوري عليّا.. هتعملي إيه»؟
– ياريت.. نفسي ده يحصل
– هل من العقل زيادة وزنك 10 كيلو بسبب شخصيتك في «لا ترد ولا تستبدل»؟
مفيش ذرة عقل.. ومخدتش رأي حد لكن عقلي اللي محتاجاه يسيبني خلاني أعمل كده، وزدتهم من 3 لـ4 أشهر.. وبسبب إصابتي في الغدة الدرقية قررت مخدش بالي طول الوقت من الأكل في تلك الفترة.
– رجعتي لوزنك الطبيعي؟
– لسه في الطريق
– كيف أتقنتِ دور الشخصية الشعبية بالمسلسل؟
أهم أدوات الممثل هي «الفرجة»، والممثل لازم طول الوقت بيتفرج ويراقب خاصة في حياته الشخصية.
– زرتي أماكن شعبية قبل تصوير المسلسل؟
مش بالضرورة لكن اعتقد إن دي فُرجة سنين.
– ورقة تتمني تستعيدي ذكرياتك معاها؟
أول مرة وقوف على المسرح لأنها ذكرى لطيفة.
– العقل أم الإحساس في المواقف المهمة؟
العقل لكن أنا غير متسرعة بقراراتي.
– إيه رأيك في مثل «عقله في رأسه يعرف خلاصه»؟
لو عقلك تمام أه.
– تستخدمي زر التجاهل امتى؟
مع الأصوات السلبية الموجودة في دماغي.
– أول حاجة هتمسحيها من دماغك؟
هلغي كل المشاكل العالمية
– قرار في حياتك فخورة باستخدام عقلك قبل قلبك؟
التخلي عن الوظيفة
– إذا كنتي خبيرة في قراءة العقول.. تحبي تقرأي عقل مين؟
عقل كل الناس.
– في جرح عقلك دائمًا بيفكرك بيه؟
مفيش جرح نسيته
– فكرة مجنونة مسيطرة عليكي؟
ألف محافظات مصر كلها
– صفة شخصية تكرهها سارة؟
جلد الذات
– لو فجأة لقيتي نفسك الإنسانة الوحيدة العاقلة وسط مجموعة مجانين؟
يا عيني على العالم لو أنا الوحيدة العاقلة
– مين واخد عقلك؟
الإنسان
– لو قابلتي خيالك في الشارع هتاخديه بالحضن؟
هجري وراه
– عقلك بيتخيل حاجات مش موجودة؟
كتير ونفسي يسود السلام العالمي
– مين بيقولك اعقلي يا سارة؟
أختي
– إذا اقتضت الظروف تتعاملي مع شخص عقله صغير.. تعملي إيه؟
بعامله أنه صغير
– صفات مواليد برج العقرب؟
شخص عاقل
– لون عقلك؟
كل ألوان الطيف
– تستلفي عقل مين لمدة يوم؟
الفنانة ميريل ستريب
– بتشحني عقلك إزاي؟
التمثيل
– لو رسمتي عقلك هترسمي إيه؟
ألوان كتير
– توافقي تقدمي دور مجنونة؟
ياريت
– أكثر ممثلة أقنعتك بدور «المجنونة»؟
زوزو نبيل
– تاخدي دواء يخليكي متفكريش؟
فورًا
– لو تعملي عيد قومي للعقل.. شعاره؟
لو جابوا للإنسان 100 عقل على عقل مش هيعجبه غير عقله
– مين أعقل انتي أم زوجك؟
زوجي
– مين يجنن الثاني.. الست ولا الراجل؟
الراجل
– شخص يمتلك مفتاح مخك الاحتياطي؟
إخواتي وزوجي
– مين أعقل شخص في حياتك؟
مفيش
– اوصفي عقلك في جملة؟
عاقل مع الغير.. مجنون مع نفسه
– إذا اضطرينا نحجزك في مستشفى مجانين «نجوم إف إم».. مين تحبي يكون في الغرفة اللي جنبك؟
محمد ممدوح «تايسون»
– خلاصة حكمتك مع الحياة؟
مفيش حاجة تستاهل تضايق نفسك
يُذاع برنامج «عين العقل» على «نجوم إف إم» يوميًا من الساعة 4:15 حتى 4:25 مساءً.
مواضيع ممكن تعجبك
أحدث الأخبار