يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، المخرج خالد يوسف، في الحلقة الثامنة من البرنامج، حيث وافق على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات خالد يوسف:
صحيت من النوم لقيت عقلك سايب رسالة بيقولك «زهقت منك وهسيبك وإوعى تدور عليّا.. هتعمل إيه»؟
هقوله عندك حق لأنه مغلبني
عقلك مختلف عن زمان؟
في حاجات اتغيرت
النضج العقلي يقلل الجرأة أم يزيدها؟
يقلل الجرأة
من غير عقلك نفسك تعمل إيه؟
أسيب نفسي براحتي
سرك الباتع في عقلك أم قلبك؟
إحساسي
امتى عقلك بيعمل عاصفة من التفكير؟
وقت التصادم مع إحساسي.. وانتصر لإحساسي في النهاية
ورقة تتمنى تستعيد ذكرياتك معها؟
مش حاضرني حاجة
رأيك في مثل «عقله في رأسه يعرف خلاصه»؟
صحيح 100%
عقلك في رأسك؟
أكيد ومسابنيش خالص لكن أنا تصادمت معاه من قبل
موقف نفسك تتجنن فيه؟
عدة مواقف
تعمل إيه لو كنت الشخص الوحيد العاقل في العالم؟
هنتحر لأنه لازم أكون مجنون زيهم
في قرارات خدتها بعقلك وندمت؟
كتير منها دخولي مجال السياسة.. لكن أنا لا أندم على قرارات
قرار خدته بقلبك لكن العقل صححه؟
مفيش
ممكن تجرح حد بكلامك؟
أنا بقول الصراحة التامة دون تجريح
تحب تقرأ عقل مين؟
طه حسين.. من رأيي أنه في تاريخ الفكر العربي شخصان لو مشينا خلف أفكارهما كانت الأمة العربية والعالم الإسلامي لهم شأن آخر، هما ابن رشد وطه حسين
عاطف الطيب وعز الدين ذو الفقار ورضوان الكاشف.. من تتوافق مع مبادئه أكثر؟
عاطف الطيب.. قدم 21 فيلما كنت أتمنى تقديم 19 فيلما منهم
أكثر فكرة مجنونة تسيطر عليك؟
أبطل إخراج وأرتاح لكن مش هعملها
عادة تكرهها في خالد؟
بشاور عقلي كتير
مين يجنن التاني.. الست أم الرجل؟
الست طبعًا
مكان عقلك رافضه طول الوقت؟
مجلس النواب
مين واخد عقلك؟
حاجات كتير ممكن فكرة أو خاطرة أو نوستالجيا
يوسف شاهين كام % عقل؟
1%
تحب تعيد مشهد إيه تاني من حياتك؟
ثورة 25 يناير
مين من الشخصيات اللي قدمتها تحب تعيش معاه يوم؟
أبو شحاتة في فيلم «دكان شحاتة» الذي قدمه محمود حميدة، لأنها تمثل الأصالة المصرية
لو الحياة امتحان.. ما هو سؤال جاوبته غلط لأنك مستخدمتش عقلك؟
كل القرارات التي استخدمت فيها عقلي معظمها كانت غلط
لو فيلم عن نفسك.. تختار نهاية مفتوحة أم منطقية أم تثير الجدل؟
مفتوحة
العقل يصنع الفيلم أم الفيلم يكشف عقل صانعه؟
الفيلم يكشف عقل الصانع
سؤال يحير عقلك؟
امتى نخرج من النفق اللي إحنا فيه
بتعرف تشتري دماغك؟
كتير
بتشحن بطارية عقلك إزاي؟
القراءة
لو عندك فرصة تعمل ريستاريت ليوم واحد في حياتك هيكون إيه؟
يوم دخولي السياسة
أخبار عقل مواليد برج الميزان؟
عاطفي ومتردد ومنظم
تستلف عقل مين؟
في عقول كثيرة منها مارتن سكورسيزي
من خذلك.. قلبك أم إحساسك؟
عقلي
لون عقلك إيه؟
أحمر
في حاجة قلبك بيقولك أيوة وعقلك لأ؟
قرار إني أدخل البرلمان أو أترشح كان إحساسي رافضه وعقلي كان موافق عليه
شعار العيد القومي للعقل؟
العقل زينة
تم حجزك في مستشفى مجانين «نجوم إف إم».. مين تحبي يكون في الغرفة اللي جنبك؟
محمود حميدة
خلاصة خبرتك مع الحياة؟
متستخدمش عقلك واستخدم إحساسك
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار