يقدم برنامج «عين العقل»، الذي يقدمه مصطفى ياسين ويذاع على «نجوم إف إم»، تجربة مختلفة لصنع محتوى يمزج بين الكوميديا والجدية، من خلال أسئلة جادة وتخيلية وغير منطقية، بعد موافقة الضيف على التنازل عن عقله طوال مدة الحلقة، لتأتي الإجابات عفوية وسريعة.
واستضاف مصطفى ياسين، الفنان حسين فهمي في ثاني حلقات البرنامج، حيث وافق على إقرار نصه: «أوافق على أن أتنازل عن عقلي طول مدة البرنامج.. ولا يحق لي المطالبة به للإجابة على أي سؤال.. وهذا إقرار مني بذلك».. وكانت هذه إجابات حسين فهمي:
– صحيت من النوم لقيت عقلك سايب رسالة بيقولك: «زهقت منك وهسيبك وإوعى تدور عليّا.. هتعمل إيه»؟
لا يمكن يسيب رسالة كده.. هو مبيزهقش مني ولا أنا بزهق منه.. إحنا توأم فصعب جدًا يحصل.
– أول ملف تحب تقفله؟
كل الملفات مفتوحة ومش بتتقفل.
– لو فجأة لقيت نفسك الإنسان الوحيد العاقل وسط مجموعة مجانين.. تعمل إيه؟
دي أحلى حاجة في الدنيا.. هم بيحكموا بالفعل
– حقك بتاخده بالعقل ولا القوة ولا الدبلوماسية؟
بالعقل.. والقلب اللي بيحركه العقل
– نفسك تتجنن في موقف خلال حياتك؟
أنا مجنون رسمي.. مفيش فنان معندوش جزء من الجنون.
– لو قابلت خيالك في الشارع هتاخذه بالحضن؟
لا
– لو رسمت عقلك هترسم إيه؟
هرسم قلب.
– بتجيلك حاله شرود؟
كتير.
– مين بياخد عقل حسين فهمي؟
السينما.
– مين بيقولك اعقل يا حسين؟
بنتي.
– أخبار عقل مواليد برج الحمل؟
في منتهى الوداعة
– مين يجنن الثاني.. الست ولا الراجل؟
الست طبعًا.
– نصيحة لاستمرار الحب؟
الثقة المطلقة بين الحبيبين.
– في العلاقة العاطفية.. نستخدم عقلنا ولا نكتفي بالقلب؟
لازم عقلنا دائمًا 100%.
– الحب لازم يكون مجنون؟
طبعًا.
– أكثر شخصية مجنونة قدمتها؟
توفيق في «الأخوة الأعداء».
– أكثر من مخرج عاقل اشتغلت معاه؟
بركات.
– أكثر مخرج مجنون؟
حسن الأمام.. لكن يوسف شاهين خارج المقاييس.
– مش عايز ترجع لمهنة الإخراج؟
إدارة الإنتاج في مصر ما تسمحش.. لأن الأفلام بتنجح وبتجيب جمهور وهو ده الوضع القائم.
– موضوع تحب تقدمه في عمل فني؟
الأمور الاجتماعية في شكل كوميدي.
– أعقل ابن من أبنائك؟
محمود أعقل واحد
– من أثر على عقلك وطريقة تفكيرك؟
والدي.. كان بيسمح إني أعمل كل حاجة في حياتي وأعيشها زي ما أنا عايز.
– العقل الكبير عند مين من أخواتك؟
شقيقي حسن رحمه الله.
– حاجة مجنونة تحب تعملها؟
عايز أطير.
– شخصية تحب تقضي معها يوم؟
شخصيتي في مسلسل «الشارد»
– تاخد دواء يخليك متفكرش؟
طبعا 100% الناس بتاخد الأدوية دي طول الوقت.
– ندمت على حاجة قبل كده؟
بصراحة مش بندم وما ببصش ورايا.
– أول حاجة هتمسحها من دماغك؟
كل المساوئ اللي أنا عملتها في حياتي.
– لو تعمل عيد قومي للعقل؟
من رأيي بلاش
– بتشحن بطارية عقلك إزاي؟
الرياضة بمارسها كل يوم.. لأنها بتقوي مسامير العقل.
– لو معاك زر بيحول أي شخص لمجنون تجربه؟
أنا ما أعرفش حد عاقل.
– لو في نسخة ثانية من حسين فهمي تحب تعرفها؟
كفاية النسخة الأولى
– اختار شخصية: الحكيم والكوميديان والجريء؟
الكوميديان طبعًا
– إذا اقتضت الظروف تتعامل مع شخص عقله صغير.. بتعمل إيه؟
بكبر عقلي
– مشهد قلت بعده «أنا مجنون»؟
محصلش.. كله بالعقل
– أوصف عقلك في جملة؟
بسيط.
– لسه بتخاف من الأماكن المرتفعة والضيقة؟
أيوة ومش عايز أتعالج
– شخص عنده مفتاح مخك الاحتياطي؟
ابني عنده المفاتيح
– إذا اضطرينا نحجزك في مستشفى مجانين «نجوم إف إم».. مين تحب يكون في الغرفة اللي جنبك؟
أحمد عكاشة
– نصيحة حياتية؟
عيش حياتك وعيش اللحظة.. الماضي انتهى مش هيرجع، والمستقبل ما حدش عارف عنه حاجة. فالحقيقة الوحيدة في حياة أي شخص فينا هي اللحظة اللي إحنا بنعيشها دلوقتي.. فعيشها بكل جمالها ومساوءها بكل حلاوتها عشان دي الحاجة الوحيدة اللي إحنا عارفينها في حياتنا.
يُذاع برنامج «عين العقل» يوميًا على «نجوم إف إم» من الساعة 4:15 حتى 4:25 مساءً.
مواضيع ممكن تعجبك
أحدث الأخبار