استضاف يوسف التهامي في حلقة اليوم الإثنين من برنامج «عيش صباحك» على «نجوم إف.إم»، الفنانة مي القاضي للحديث عن أحدث أعمالها الفنية.
وانطلقت الفنانة مي القاضي للحديث عن دور «هند» في مسلسل «2 قهوة» الذي يُعرض حاليًا، وقالت عن تحضيرها للشخصية: «كان لازم أدوّر لها على مبررات للدور وأدافع عنها علشان الناس تصدقها وعملت لها خلفية وتاريخ وناقشتها مع أستاذ عمرو محمود ياسين وعجبه»، مضيفة: «بحب ألتزم بالورق زي ما هو بس فيه شخصيات بتكون طبيعتها إن مواقف الحياة وصلتها للي هي عليه دلوقت وده اللي المفروض الواحد يذاكره».
وأوضحت مي القاضي: «شخصية هند مرت بحاجات في حياتها خليتها تشوف إن نجاحها وشغلها والفلوس هم الأمان الوحيد في الدنيا وده وصلها إنها تعمل أي حاجة علشان ده وده غلط لان مش كل الأمان مادي».
وقالت: «ردود أفعال الناس على (2 قهوة) حلوة جدا والمسلسل محقق نجاح كبير أوي وشخصية هند مستفزة الناس جدا رغم إن فيه ناس متعاطفة معاها لكن قدام لما يعرفوا تفاصيل معينة أنا عارفة إن فيه ستات كتير هتتعاطف معاها علشان فيه ظروف مرت بيها في طفولتها».
كما تحدثت عن علاقتها بالسوشيال ميديا وردود الأفعال عليها، وقالت: «السوشيال ميديا مهمة لكن الجمهور زكي وعارف الحاجات المدفوعة وغير الحقيقية وإيه هي الآراء الحقيقية، وأنا بحس إن السوشيال ميديا بتقرب الفنان للناس ولما يكون فيه حاجة صح بعملها بشاركها مع الناس لأن فيه ناس ممكن تقلدك في الحاجات دي».
وأكدت ان مشاركتها في مسلسل «العتاولة» كانت نقطة فارقة في اختلاف نوعية أدوارها: «كنت دايما بلعب في المنطقة الآمنة وأدواري شبه بعضها لكن من أول دوري في العتاولة لوّنت في أدواري والممثل هو اللي يقدر يعمل كل الأدوار فقررت إني اعمل شخصية جديدة عليا علشان أعرف الناس إني ممثلة متنوعة لأن كل الحاجات كانت بقت شبه بعضها وأنت لما يتنجح في حتة بيحطوك فيها دايمًا».
وقالت إنها تتمنى العمل مع عدد من نجوم الفن مثل يسرا ومنة شلبي ونيللي كريم وكريم عبد العزيز، ومن المخرجين: مروان حامد وتامر محسن وهاني خليفة، مشيرة إلى أن أفضل أدوارها بالنسبة لها في مسلسل «سمرا» وهو مسلسل لبناني مصري.
كما أشارت إلى نصيحة وجهها لها الفنان أحمد السقا خلال عملهما سويًا في مسلسل «خطوط حمراء» عام 2012 «أحمد السقا في خطوط حمرا قال لي هيجيلك حاجات كتير مش شرط كلها تكون كويسة فاتعلمي تقولي لأ».
وقالت الفنانة مي القاضي إنها لن تشارك في موسم دراما رمضان المقبل في 2026 وإنها تحتاج إلى أن تركز بشكل أكبر في الأعمال السينمائية.
مواضيع ممكن تعجبك
أحدث الأخبار