استضافت جيهان عبد الله، The Global Icon النجم محمد رمضان، اليوم الخميس، في الجزء الثاني من لقائه في برنامج «أجمد 7» عبر «نجوم إف.إم».
وأكد النجم محمد رمضان في لقائه أن علاقته بالناس هي «رأس ماله»، مؤكدًا: «هبقى شخص مش مقدر نعمة ربنا إني أتعامل مع النعمة اللي ربنا إداهالي، وهي الناس في حياتي، بشكل غير لائق، وممكن ربنا يبعد الناس دي عنك ويقول لك أنا هريحك طالما أنت متضايق وتبقى بتتمنى إن الناس ترجع حواليك تاني فربنا يديمها نعمة».
وتابع: «مش فكرة إني باجي على نفسي علشان أتعامل مع الجمهور، أنا بتعامل بصدق حقيقي، وعمري ما تعبت، وأنا وسط الناس بنسى التعب ده، وزي ما أنا بكون حاجة بتبسطهم، العكس صحيح هم برده بيبسطوني وبيخلوني أنسى تعبي».
وحكى «رمضان» تفاصيل وكواليس تعاونه في أغنية جديدة تصدر قريبًا مع لارا ترامب زوجة نجل الرئيس الأمريكي دونالد ترامب، وقال: «لما جالي العرض افتكرته هزار، مدير أعمالها كلم الوكيل بتاعي وقال له إنها عاوزة تعمل أغنية مع محمد رمضان، فلما كلمني فقلت له أكيد اشتغالة، فقال لي هي عاوزة تقابلك وعاوزين نصور الكليب في بيت الرئيس علشان التأمين، كملت معاه وكنت متأكد إنه أكيد مش حقيقة، لحد ما بعتولي الأغنية وكانت رومانسية، ولما بحثت لقيت عندها أغاني وحظي الحلو إن ده كان أول كليب ليها وده هيثير الجمهور الأمريكي إنه يشوف الكليب، واشتغلت على التراك، والأغنية متأكد هتعجب الناس، ونزولها يوم 22 يناير 2026 إن شاء الله بعد أسبوع من حفلي في ماديسون سكوير كأول مغني مصري هيغني هناك وهي أشهر ساحة غناء في العالم ودي اللي غنى فيها مايكل جاكسون ولعب فيها محمد علي كلاي».
مواضيع ممكن تعجبك
أحدث الأخبار
