استضافت جيهان عبد الله، The Global Icon النجم محمد رمضان، اليوم الخميس، في الجزء الثاني من لقائه في برنامج «أجمد 7» عبر «نجوم إف.إم».
وتحدث النجم محمد رمضان عن علاقته بعالم السوشيال ميديا، وقال: «الفنان نفسه بيختار حابب حياتك منفتحة على الجمهور ولا تكون منغلقة، وكل واحدة ليها مميزات وعيوب، وفيها نماذج، يعني عبد الحليم حافظ كان منفتح عالجمهور، ودخلهم أوضة نومه وسريره والأدوية عالكومود جنبه، وأنا دايمًا بحب أذكر عبد الحليم حافظ ومحمد شبانة ابن شقيقه صديقي وعارف مدى حبي له ولذلك ما بخافش أتكلم عنه لأن عيلته بتحمي حقوقه بشكل كبير، وعبد الحليم فتح حياته للجمهور وما كانش مطالب يقول لهم سبب تعبه إيه، كان صادق جدا، وقال لهم سبب التعب البلهارسيا مع إن بعض الناس ممكن تقول بلاش تقول، لكن هو بنى علاقة صادقة بينه وبين الجمهور، وفيه نجوم آخرين ما كناش نعرف حياتهم ولا ساكن فين ولا بيته شكله إيه ولا بره الشغل شكله إيه، لكن النتيجة اللي أحبها هي نتيجة عبد الحليم حافظ، في الآخر كل حاجة حصلت له لما كان يتألم مصر كانت بتتألم ولما يفرح بيخلي مصر تفرح، فقدر يخلي الشعب عيلته، وده بان في كل شيء حتى فترة تعبه وجنازته».
وأضاف: «أنا اخترت إن الناس تكون عيلتي، فلو جبت عربية جديدة زي ما بتفرجها لوالدتك أو زوجتك أنا برده بفرجها لجمهوري، وحتى لو ده ضرني شوية في الأول، لكن على المدى البعيد ده شيء أفضل، والناس اتعودت على ده فما بقوش بينبهروا، وحتى لما بيشوفوني مع نجوم كبار يصدقوا إننا ممكن نكون أحسن وما يعملوش سقف، وده حتى يساعدهم في حياتهم الشخصية».
وعن الشيء الوحيد الذي لا يمكن أن يشاركه مع جمهوره عبر منصات التواصل الاجتماعي، قال: «الحاجة اللي مش ممكن أحطها على السوشيال ميديا، الحاجات الخاصة بعلاقتي بربنا، مثلا يعني عملت عمرة كتير لكن عمري ما حطيت حاجة، وفكرة إن عقلي يفكر إني أطلع موبايل قدام الكعبة مش موجودة، أنا مع الكبير خالص، دي لحظة خاصة أنا عاوز أبقى مع العظيم أوي».
مواضيع ممكن تعجبك
أحدث الأخبار
