آية سليم لـ«عيش صباحك»: دوري في «السلم والثعبان 2» شبهي.. وخفت من المقارنة بالجزء الأول

استضاف يوسف التهامي وفانا إمام في حلقة اليوم من برنامج «عيش صباحك» على «نجوم إف.إم» الفنانة آية سليم، والتي تحدثت عن أحدث أعمالها الفنية.

وتحدثت آية سليم عن مشاركتها في فيلم «السلم والثعبان 2»، وحماسها للمشاركة به: «الجزء الأول كنت ممكن أتفرج عليه مرتين في الشهر وفكرة إني هقدم جزء تاني كانت محمساني لكن المفاجأة هو إنه مالوش علاقة بالجزء الأولاني خالص، هو ليه علاقة بيه بشكل ما كقصة وكأنه بعد ما حازم وياسمين اتجوزوا خلاص».

وعن المقارنة بالجزء الأول قالت: «كنت مقلقة من المقارنة وكلنا كان عندنا القلق ده، لكن كل اللي شافوه قالوا مالوش علاقة بالجزء الأولاني خالص».

وعن دورها، أوضحت: «لما قعدت اتكلمت مع أستاذ طارق العريان قال لي خلاص أنتي أمينة وأنا شايفك في ده، وأنا في الحياة عمومًا أنا الصاحبة اللي بتعنف صاحبتها طول الوقت وكنت حاسة إن الدور قريب مني أوي زي آية في الحياة العادية بتاعتي».

وأضافت: «أهم حاجة بالنسبة لي كانت الورق وكمان فكرة المخرج طارق العريان إنه من المخرجين اللي عاوزة أشتغل معاهم وكمان فكرة إنه السلم والتعبان نفسه وفيلم أنا بحبه».

كما تطرقت لفكرة تقديم أجزاء أخرى من الأعمال الفنية، وقالت: «فكرة الأجزاء بتخوفني يعني لما عملت مسلسل (وبينا ميعاد) الجزء التاني لأن فيه حاجات بتحتاج تبقى جزء واحد من غير تجويد وفيه حاجات بتحتاج تبقى جزئين».