هند عبد الحليم لـ«عيش صباحك»: شخصيتي في «ديجافو» كانت «متعبة نفسيا» و«أزمة منتصف العمر» الأقرب لقلبي

استضاف يوسف التهامي وفانا إمام في حلقة اليوم الثلاثاء من برنامج «عيش صباحك» على «نجوم إف.إم» الفنانة هند عبد الحليم للحديث عن أحدث أعمالها الفنية.

وانطلق الحديث من مسلسل «ما تراه ليس كما يبدو» الذي شاركت هند خلاله في حكاية «ديجافو»، حيث قالت: «حبيت فكرة الأخت اللي مع أخوها في أي حاجة وبتفضل وراه وتساعده، لحد ما بتدفع تمن وذنب مش ذنبها، فالفكرة عجبتني وكانت جديدة عليا، وهي شخصية طيبة ومن كتر طيبتها ممكن تؤذي نفسها وهي مش مدركة لكنها بتدرك في الآخر وبتتعلم».

وأوضحت أن هناك عدد من المشاهد التي كانت مرهقة نفسيا بالنسبة لها: «فيه كذا مشهد كانوا متعبين منهم لما أخوها بييجي ومعاه مراته اللي ماتت في الحادثة وعاوز يدفنها، وفيه مشهد لما بتسأله عملت إيه في موسى يا سيف، علشان ده كان مشهد نقطة تحول في شخصيتها».

وأشارت «هند» إلى أن أقرب الأعمال والشخصيات إلى قلبها خلال مشوارها هي شخصية «سلمى» في مسلسل «أزمة منتصف العمر».

ومن خلال أحداث حكاية «ديجافو» التي قدمتها، قالت هند عبد الحليم: «أكيد كلنا عندنا ذكريات أليمة جدًا نتمنى ننساها، لكن الحاجات دي بتخلق مننا بني آدمين وحاجات أحسن بعد كده هنحس إننا اتطورنا بعد كده».

وعن علاقتها بمواقع التواصل الاجتماعي، قالت هند عبد الحليم: «الجمهور له حق عليا إني أبقى موجودة عالسوشيال ميديا وده بحاول أعمله وفيه أوقات بيبقى لازم أبقى موجودة حتى لو مش عاوزة، والتعليقات على السوشيال ميديا بتأثر عليا فعلا، لأن ممكن ييجي تعليق مؤذي جدا من إنسان ما يعرفنيش، ومش من حق أي حد يؤذي حد بأي طريقة، النقد لازم يبقى موجود لكن المهم الطريقة، ولو هغير حاجة في السوشيال ميديا هخلي فيه تحري أكتر عن الحسابات وإنه مع أول تصرف مش كويس يتلغي من عالسوشيال ميديا».

كما تمنت تقديم عمل موسيقي استعراضي، موضحة: «لكن الصناع بيشوفوها حاجة مش مضمونة ومفيش وقت ولا طاقة علشان يعملوا ده»، وأضافت: «نفسي أقف قدام الفنان يحيى الفخراني وأشتغل معاه».

وعن مشاريعها المستقبلية، قالت: «لسه فيه ورق بقراه وإن شاء الله يبقى فيه حاجات الفترة الجاية وإن شاء الله يبقى فيه مشروع أغاني في المستقبل».