كشف الفنان تامر حسني عن آخر تطورات الحالة الصحية لنجله «آدم»، بعد دخوله المستشفى في الفترة الماضية وخضوعه لعمليتين جراحيتين كبيرتين، وأوضح، اليوم الأربعاء، عبر حسابه على «فيسبوك»، أن نجله أُصيب بـ«انفجار الزائدة المفاجئ».
وقال تامر حسني: «أنا مش عارف أشكركم إزاي على كمّ الدعوات اللي دعيتوها لربنا علشان شفاء (آدم) ابني، واللي وصلتني منكم هنا، وعلى تليفوني، وتليفونات كل اللي حواليا، هو عمل عمليتين كبيرتين بسبب انفجار الزائدة المفاجئ، اللي كانت أعراضها مجرد سخونية عادية. وبقول لكم كده علشان تبقوا حريصين أكتر مع نفسكم ومع أولادكم، ومش كل سخونية نقول عليها شوية برد وخلاص».
أضاف: «لازم تروحوا تكشفوا كويس، وتعملوا سونار على البطن والزائدة مرة واتنين، لأن ساعات ما بتظهرش بسهولة، ولازم الدكتور يضغط بطريقة معيّنة، يمكن أقوى شوية، علشان يقدر يكتشفها. أنا سمعت كتير اليومين دول إن الزائدة خادعة جدًا».
تابع: «اطمنوا أكتر من مرة قبل لحظة الانفجار، علشان بجد المشاكل اللي بتحصل بعدها كبيرة ومؤلمة جدًا. حبيبي (آدم) عمل عمليتين صعبين جدًا عليه، وبفضل دعواتكم منتظرين تكون النتائج طيبة إن شاء الله، ويعدي مرحلة الخطر.. يا رب، بحق (كن فيكون)، اشفه وعافه، هو وكل أولادنا. هو راجل وهيتحمل، وإن شاء الله ربنا يكرمه ويعافيه ويحفظه هو وإخواته، ويحفظ كل أولادكم يا رب».
أوضح: «أحب أكرر شكري من كل قلبي على دعواتكم، أنا شايف قلب كل واحد فيكم وهو بيدعي بصدق. متشكر جدًا يا جماعة، شكرًا لكل اللي اهتم وسأل عن ابني ودعا له، سواء هنا أو على التليفون، أو حتى اللي طلعوا له صدقات من غير ما يعرفونا شخصيًا، أنا مش لاقي كلام أشكركم بيه، وأنا كمان بدعيلكم، وبقول لكم: مثلها وأضعاف أضعافها».
ويعرض لتامر حسني حاليا فيلم «ريستارت» ويشاركه البطولة كل من هنا الزاهد، محمد ثروت، باسم سمرة، عصام السقا، ميمي جمال، أحمد عزيز، أحمد علي. وعدد من ضيوف الشرف، على رأسهم: إلهام شاهين، محمد رجب، شيماء سيف، رانيا منصور، توانا الجوهري، ولاعب نادى الزمالك السابق أحمد حسام ميدو، والفيلم من تأليف أيمن بهجت قمر، وإخراج سارة وفيق.
*صورة من الحساب الرسمي لتامر حسني على إنستجرام.
مواضيع ممكن تعجبك
أحدث الأخبار
