الدكتورة هبة حسني لـ«عيش صباحك»: مشاركتي في القمة الدولية للمرأة تتناول الاستدامة لدى الإنسان

استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الدكتورة هبة حسني، ماجستير العلوم ودكتوراه في علوم الغذاء والتغذية العلاجية، للحديث عن مشاركتها في النسخة السادسة من القمة الدولية للمرأة International Women Summit، المقرر أن تقام غدًا الأربعاء في فندق «نايل ريتز».

وقالت د. هبة حسني إنها سعيدة بنسخة العام الحالي من قمة المرأة الدولية حيث تحرص على حضور القمة في كل عام لكنها تشارك بكلمة لأول مرة في نسخة العام الحالي، موضحة: «مبسوطة بالمشاركة وإني هنقل خبرات وأسمع قصص ملهمة إلى حد كبير وإن شاء الله تكون نسخة مختلفة وتضم سيدات من خلفيات مختلفة، وأكتر حاجتين حمّسوني للمشاركة هي الشراكات اللي بنوها مع الناس اللي ليهم تأثير وعمل مجتمعي قوي وده له معنى وأثر، وكمان السنة دي بيتكلموا على فكرة الاستدامة لكن من كل الجوانب وكيفية تطبيق المصطلح».

وقالت إن كلمتها في نسخة العام الحالي من القمة ستكون عن «الاستدامة من وجهة نظر الإنسان العادي بعيدًا عن المنظمات والهيئات، لأن الإنسان لو مفيش اهتمام به والاستدامة مش في دماغه مش هنقدر نطبقها بشكل أكبر، وإزاي الإنسان يطبق الاستدامة على كل جوانب حياته».

وأشارت د. هبة حسني إلى أهمية التوازن بين الحياة الشخصية والعملية بالنسبة للسيدة في المجتمع، مضيفة: «ينفع الست تكون في مراكز قيادية وفي نفس الوقت تكون أم وبتمارس حياتها الشخصية بشكل عادي، والتوازن بين الشغل والحياة الشخصية هو اللي بيخلي الإنسان قادر يكمل».

وفي هذا الصدد، أكدت على بعض النصائح للسيدات وهي: «ما تبطليش تتعلّمي واستغلي أي وقت فاضي حتى لو ما استفادتيش عالمستوى العملي هيكون عالمستوى الشخصي وهتوسعي تفكيرك، وما تدخليش في مقارنة مع حد لأن كل حد بيمشي طريق معين وبينجح فيه في الوقت المقدّر له، لكن قارني نفسك بنفسك والمهم تكون بتتطوري».

وأضافت: «مفيش تحقيق توازن من غير تضحيات لكن فيه شيء من التوازن بيخلي الإنسان مرتاح، إحنا عيشنا سنين كتير بالوصمة بتاعت ما تشتغليش علشان بيتك وولادك لكن أنا ضد التعميم لأن فيه ست بتكون أسعد لما تشتغل، وكده كده بتعدي أيام وحشة والحياة مش وردي، وفيه لحظات فشل، وأنجح الناس بيعدوا بأكتر لحظات فشل على الإطلاق».

وأكدت أنه يمكن تحقيق التوازن بين الحياة الشخصية والعملية للمرأة، موضحة: «الأمر بيكون الجودة مش الكم، ممكن أقعد مع ولادي ساعة واحدة في اليوم لكن يكون ليها قيمة».

وقالت د. هبة حسني إن أبرز الرسائل التي تتمنى إيصالها للسيدات من خلال المشاركة في قمة المرأة الدولية هي: «أن المرأة اللي عندها حلم لازم تكون مصدقاه أكتر من الآخرين، ويكون عندها إيمان بحلمها وإنها هتجتهد فيها وربنا هيوفقها، وكمان إنها تكون مرنة ومستعدة لتغيير خطتها في أي وقت وده بييجي بعد تجارب ووقت».