استضاف يوسف التهامي وفانا إمام في حلقة اليوم من «قبل ما تفطر بكتير» على «نجوم إف.إم»، الفنان صالح عبد النبي للحديث عن أحدث أعماله الفنية في الجزء الثالث من مسلسل «كامل العدد» الذي عُرض في النصف الأول من رمضان الحالي.
وقال الفنان صالح عبد النبي: «كواليس مسلسل كامل العدد كانت عيلة حقيقية بجد وأنا بالنسبة لي كانت أول مرة أقعد معاهم الوقت ده كله عكس الأجزاء اللي فاتت، ولغاية دلوقت بنجتمع وبنفطر سوا وبنتسحر سوا في رمضان»
وأضاف: «قبل ما يكلموني علشان الجزء التالت كنت بقول لمراتي إن أكيد لو فيه جزء تالت مش هيكلموني لأن الناس عرفوا إني شرير وما بحبش أولادي في المسلسل، فلما كلموني قلت لهم إزاي، فلما قريت لقيت إني داخل الجزء التالت علشان أصلح غلطتي، وأنا كان فيه أطفال بيخافوا يتصوروا معايا دلوقت بقوا بيحبوني».
وعن التغير الذي شهدته شخصيته في العمل، أوضح: «السنة دي كنت مبسوط كأن السنة دي أول جزء لأني اشتغلت عالشخصية ومش هرجع شرير تاني، وكانت محتاجة مجهود أكتر وحسيت إن لازم أغيّر (يزبك) اللي كانوا عارفينه أول جزء وتاني جزء، وكان فيه ناس بتبعت لي على إنستجرام إنه من فضلك ما تطلعش شرير في الآخر علشان إحنا صدقناك».
وأكد الفنان صالح عبد النبي أنه يخشى من إظهار الجانب الطيب في شخصيته الحقيقية، وقال: «اكتشفت إني طيب أوي في الجزء ده وكانت دمعتي قريبة جدًا وأنا في طبعي ما بحبش أعمل حاجة رومانسي أو شخصية طيبة لكن أنا كصالح طيب أوي وما كنتش عاوز ده يبان، لكن لما كنت بقرا السكريبت في البيت كنت بعيط».
وأشار إلى أنه بالنسبة له «تحضير الشخصية الشريرة أسهل لأن سهل إنك تزعق وتتعصب، لكن الطيب بحس إنها فيها مشاعر أكتر ولازم تفضل تقرا كويس علشان تحس، وأنا أول مرة أقرا اسكريبت العمل كله كنت بقرأ قبل كده دوري بس»
وتحدث عن تصوير مشهد المستشفى وقال: «كنت تعبان قبلها بيومين وكنت عاوز أفضل تعبان لحد تصوير مشهد المستشفى علشان أقدمه صح».
مواضيع ممكن تعجبك
أحدث الأخبار
