يحتفل العالم بعيد الحب في 14 فبراير كل عام، وهو يوم مميز ومناسبة للتعبير عن حبنا للمقربين لدينا سواء من الأهل أو الأصدقاء وبالطبع شركاء حياتنا.
وفي عيد الحب تستعرض معكم «نجوم إف.إم» معنى الحب لدى عدد من نجوم الفن من ضيوف برامجها على الهواء.
هنا الزاهد
الفنانة هنا الزاهد قالت في لقاء لها عبر برنامج «كلاكيت»: «الحب هو الأمان والسند وهو حاجة كبيرة وغالية أوي مش سهل تلاقيه، هو سعادة، وبحس إنه هو شغف وأجمل حاجة في الدنيا، وهو اللي بيخليني عايشة ومبسوطة وعندي نفس أعمل كل حاجة، وأنا مؤمنة إن الحب مش من أول نظرة يمكن الإعجاب هو اللي من أول نظرة، لأن الحب حاجة غالية وأكبر من إنك تحبي من أول نظرة».
تامر حسني
الفنان تامر حسني قال أيضًا في مداخلة هاتفية لبرنامج «كلاكيت»: «فيه حب الناس بتتوهم إنه هو حب العمر وبعدين بيظهر حب يدفن الحب الأولاني وبيكون حب حقيقي، وساعتها بيعرف إنه ده حب العمر اللي بيكمل عليه بس الموضوع نسبي بين كل اتنين».
حسين فهمي
الفنان حسين فهمي قال في لقائه ببرنامج «أسرار النجوم»: «بحب الفالنتاين جدا لأني بحب الحب والناس والحياة فالفالنتاين ده جزء مكمل وبالنسبة لي كل الأيام هي فالنتاين، وأنا بحب أدلع وأقدر الست، أنا حبيت أمي جدا وهي ست مختلفة عن ستات كتير جدا مثقفة ودارسة وعلمتنا إزاي نعلم نفسنا، سيدة مجتمع بالمعنى الصحيح.. وكانت ست بالنسبة لي مثل أعلى».
نسرين طافش
الفنانة نسرين طافش قالت أيضًا في لقاء سابق لها عبر «أسرار النجوم»: «أنا مؤمنة إن قصص الحب اللي بنشوفها في التلفزيون والسينما مش هي قصص الحب في الحياة، كل قصص الحب وإن كان فيها بعض النقاط المشتركة فيها حاجات كتير مالهاش علاقة ببعض، زي بسمة الأصابع، وفيه ناس بيقعوا في فخ إسقاط قصص التلفزيون على حياتهم فيطبقوها في الواقع، حل الواحد يتفرج على الأحاسيس دي علشان تعلي أجواء الحب، لكن يراعي خصوصية علاقته. قصص الحب بتختلف في مراحل حياتنا، يعني الحب الأول كنا فاكرينه الحب الخطير اللي ما حصلش، والحب كله صادق ومفيش حب حقيقي ومش حقيقي لكن خبرتك مع الوقت وطرق التعبير عن الحب بتختلف».
رانيا يوسف
كما قالت الفنانة رانيا يوسف في لقاء سابق لـ«أسرار النجوم»: «أنا معرفش أعيش من غير حب ده غذاء الروح معرفش أنزل أشتغل وأروح وأنام زي الآلة ومن غير حد يقول لك كلمة حلوة ويطبطب عليكي ويبعت لك ورد ومكالمة لطيفة الصبح».
مواضيع ممكن تعجبك
أحدث الأخبار