عبير صبري لـ«كلاكيت»: حلمي تقديم حياة داليدا.. وبحاول أضيف خفة الدم لشخصيات الشر

استضافت لينة الطهطاوي في حلقة اليوم من برنامج «كلاكيت» على «نجوم إف.إم»، الفنانة عبير صبري للحديث عن أحدث أعمالها الفنية.

وقالت الفنانة عبير صبري: «أنا هدفي إني أعمل شغلي صح وأكون وشغولة بنفسي فقط ولا باصة للي جنبي ولا أبص لورقة اللي جنبي، وساعات بيحصل لي كده من الآخرين، لكن اللي بيخليني أحب نجاح الناس إني ببص لشغلي وبروح أطلع الجهد اللي حضرته وبالتالي ما ببقاش شايفة حاجة تانية، لكن لما بلاقي حد زيي بحترمه وبشوف إنه ناجح، لكن غير كده ما بجاملش حد»، مؤكدة أن «اللي بيقارن نفسه بغيره بعد شوية بيبدأ يقلده وكده أنت فقدت ذاتك خلاص، ولا بقيت الشخص التاني ولا بقيت نفسك».

الطوفان

وأضافت عبير صبري: «لما بيجيلي عمل مش بقرا السكريبت وخلاص لكن بتعرف على الشخصية كويس أوي وأدور جواها هعملها إزاي، وهي بتتصرف كده إزاي وأطلع لها عقدة داخلية ليها، وبحاول أحط خفة الدم مع شخصيات الشر».

اقرأ أيضا‎

وفاء عامر تُطمئن جمهورها بعد إصابتها خلال تصوير مسلسلها الرمضاني

وتطرقت لشخصيتها في مسلسل «الطوفان» وقالت: «الحاجة شريفة دي أنا شوفتها إنها كانت عندها مرحلة وحشة في حياتها وبعدين قررت تتجوز وتجيب عيال ولما شافت جوزها هيرجع لمراته الأولى كانت بتتصرف صح لفترة وبعدين وقعت»، مؤكدة أن «اللي بيخلي الشخصية تعيش إنك تخلقي شخص حقيقي الناس تشوفه على الشاشة».

خيانة عهد

كما تحدثت عن شخصيتها في مسلسل «خيانة عهد»، موضحة: «بحب أعمل الشر علشان بيساعدني أعمل توازن مع شخصيتي الحقيقية، أنا شخصيتي مسالمة وهادية وفي حالها، فممكن شخصيتي الحقيقية ما تاخدش حقها فده اللي بيوازنه إني بعمل أدوار الشر، والأدوار دي بتساعدني إني ما يصعبش عليا نفسي».

الحجاب

كما تحدثت عن فترة عودتها للفن بعد ارتدائها للحجاب وابتعادها لنحو 4 سنوات، وقالت: «قلت هوري الناس إني هشتغل وهنجح ومفيش معوقات هتقف قصادي، وقلت هنجح بمجهودي وحطيت ده في ذهني وكان عندي اشتياق أشتغل وأنجح وبدأت أركز في أدواري وعملت وقتها مع سبق الإصرار».

داليدا

كما عبرت عن أمنيتها في تقديم شخصية الفنانة الراحلة داليدا، وقالت: «بحلم أعمل داليدا، داليدا حلمي المرعب، لدرجة بزعل لما ألاقي حد بيقول عاوز أعمل داليدا، وهي بالنسبة لي شخصية درامية عميقة وإنسانية ونسائية وتجسيد لمشاعر الحب والضعف والاكتئاب، وعندها إشكاليات مع الموت ومع الكبر في العمر وحاجات كتير أوي عميقة وإنسانية، وبشوف إني شبهها في العاطفة، أنا عاطفية ورومانسية جدًا وساذجة في الرومانسية، وبغير.. لكن مش الغيرة الحمقاء».