سامر فرّاج مؤسس «ماركتيرز ليج» يتحدث لـ«عيش صباحك» عن الجديد في النسخة الثامنة للمؤتمر

استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، سامر فرّاج الرئيس التنفيذي لشركة «سان آند سام» ومؤسس مؤتمر «ماركتيرز ليج»، للحديث عن النسخة الثامنة من المؤتمر والتي تنطلق خلال أيام.

فكرة المؤتمر

وقال سامر فرّاج مؤسس مؤتمر «ماركتيرز ليج»، إن «فكرة المؤتمر بدأت في 2016 لضم كل العاملين في صناعة التسويق وكانت الفكرة كيف نجمع المسوقين لأنهم ليس لهم كلية أو نقابة تجمعهم فأردنا أن نجمعهم، وأنا من العاملين في مجال الإعلان كان عندنا مشكلة لأننا لا نعرف كيف نصل لعميلنا وهو مسئول التسويق، وبدأنا نختار الناس من ذوي مواصفات معينة، ومسئولي التسويق مهمين لأنهم معهم ميزانية الشركة واستراتيجية التسويق وغيره، فكان لازم يكون فيه رسالة قوية يهتموا يشوفوها، فقدرنا نوصل لشخصية مهمة في عامل التسويق وهو فيليب كوتلر وما كانش فيه فرصة إنه ييجي لكن كان المهم يكون مشارك بفيديو علشان ننول اهتمام المشاركين، وكان أول يوم في أول نسخة الموضوع صعب علشان ما كانش لينا مرجعية لحاجة زي كده قبل كده، لكن بعد كده الموضوع بقى أفضل».

الاستمرارية

وعن استمرارية المؤتمر للنسخة الثامنة المقبلة، قال سامر فراج: «الحفاظ على النجاح جاء بسبب التجربة الأولى التي تفادينا بعدها الأخطاء التي من الممكن أن تحدث، في كل مرة كانت توضع علينا مسئولية أن نتفوق على أنفسنا في كل مرة لأننا من المؤسسين لهذه الفكرة، وأنا بتعامل مع الموضوع إنه مش مجرد مؤتمر لكنه حدث من أول إزاي تعمل البراند وتقدمه إزاي وقبل ده كله يكون فيه قيمة للي أنت بتعمله، وكان هدفي أعمل رابطة بين المسوقين وده بيخلق تبادل في البيزنيس وتحالفات بين الشركات».

النسخة الثامنة

وأوضح مؤسس مؤتمر «ماركتيرز ليج» أن المؤتمر غاب لعامين ونصف ليعود في نسخته الجديدة التي تُقام في قصر غرناطة بمصر الجديدة يومي 7 و8 ديسمبر، ومتاح الحجز لحضورها من خلال موقع «تذكرتي»، وقال: «روحنا نعمله في قصر غرناطة وهو ما كانش حد يعرف عنه حاجة وهو قدام حديقة الميريلاند وكانوا لسه مجددينه وفاتحينه ولقيته حاجة فوق الخيال، وقلنا هنعمل المؤتمر هناك، وأحب أوجه كل الشكر للسيدة هالة حجازي المدير التنفيذي لشركة النيل للإنتاج الإذاعي اللي كلها طاقة حب وشغل، وكانت من أوائل من آمنوا بالفكرة منذ بدايتها في 2016 وكانت نجوم إف إم معانا، ورجعنا تاني مع بعض وأنا بتفاءل بيها وهي قناة مسموعة وفرصة حلوة إني أشكركم».

ما الجديد؟

وعن الجديد في النسخة الثامنة لمؤتمر «ماركتيرز ليج»، قال سامر فراج: «المرة دي بنعمل حاجة مختلفة ما عملناهاش قبل كده ولقينا إن السوق محتاج لها جدا، وإحنا بدأنا نشوف تشوه إعلاني في الفترة الأخيرة والإعلانات بقت شبه بعض مش زي زمان، وبقيت بفكر ليه ده ما عادش بيحصل وكله بقى شبه بعضه، ولقيت فيه مشكلة في العلاقة بين المسوقين ووكالات الإعلان ولازم نتكلم فيها ونفهمها كويس، والقصة تحولت إني معايا فلوس وعاوز أصرفها ومين صرف أكتر، فقلنا نصحح المفاهيم ونجيب الناس اللي فاهمة في الحتة دي يوضحوا للناس، وأصريت إني ما أجيبش أي حد أجنبي في النسخة دي وكلهم مصريين من كبار المعلنين».

تطبيق للمسوّقين

كما كشف عن تطبيق ومنصة جديدة تم العمل عليها وسيتم إطلاقها خلال النسخة الجديدة، موضحًا: «تطبيق بيحل مشكلة الماركتيرز مع وكالة الإعلان إنه يعرف أحداث السنة كلها علشان يحط خططه واستراتيجيته، ومين أحسن أفراد في المجالات اللي بحتاج لها من تنظيم مؤتمرات أو طباعة أو غيره وموجود عليه وكالات إعلان وموردين مباشرين أو فريلانسرز».