استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنانة الشابة جنا الأشقر للحديث عن أحدث أدوارها في مسلسل «وتر حساس» الذي يُعرض حاليًا.
وتحدثت جنا الأشقر عن بداياتها الفنية وقالت: «في آخر سنة جامعة أخدت كورس مسرح وجربت ورشة تمثيل وكانت لذيذة وانبسطت ولقيت نفسي في الموضوع وبدأت أحسن من نفسي جوه وبره التمثيل واشتغلت على نفسي في حاجات مختلفة ولحد دلوقت مكملة دراسة من خلال ورش فنية، وبعد كده جالي تجارب أداء من خلال ورش التمثيل وكان أول واحد لمسلسل كامل العدد وعملت تجربة الأداء ولقيت نفسي اتقبلت وعملت الشخصية».
وعن مسلسلها الجديد «وتر حساس» قالت: «كانت عجباني القصة أوي والإخراج وكان نفسي أشتغل مع المخرج أستاذ وائل فرج والأبطال الكبار اللي ممكن أتعلم منهم».
وتحدثت عن شخصية «ليلى» التي قدمتها وقالت: «في الأول فكرت إني هاخد دور حلو وشخصية فيها مخاطرة وهقف قدام ناس كبيرة، لكن في نفس الوقت ما كنتش عارفة الناس هتتقبل ليلى إزاي لأن كل حاجة بالنسبة لي كانت جديدة، وأستاذ وائل وكل النجوم الكبيرة ساعدوني فكل حاجة كانت الحمد لله تمام».
وأوضحت التعليقات التي استقبلتها عن دورها: «أكتر تعليق جالي على ليلى إنها رقيقة وهادية وتفكيرها وطريقتها مش مصرية أوي لكن مع كده الناس تقبلوها الحمد لله بفكرها اللي مش مصري لأني توقعت يكون فيه هجوم عليها لكن هي مش بتعمل الغلط علشان عاوزة تعمل الغلط لكن هي مش عارفة إنه غلط وهي على نياتها وعايشة في قوقعتها وروتينية».
وعن طول حلقات المسلسل التي تصل لـ45 حلقة، قالت: «ممكن أتاخذ من فكرة 45 حلقة كمشاهدة لكن تعليقات سمعتها كتير إن الناس بتستنى الساعة بتاعت المسلسل العيلة تتجمع وتتفرج فهو خلق حاجة ما كانتش هتيجي من مسلسل 15 أو 30 حلقة، وأنا بالنسبة لي المسلسلات الطويلة بتقلب كأنها جزء من العيلة وبتعيش مع الناس».
وأشارت جنا الأشقر إلى أنها حاولت التعامل مع التعلقات التي استقبلتها عبر مواقع التواصل الاجتماعي، وقالت: «أنا أول مرة أتحط في كم التعرض للتعليقات ده وأنا مش بقعد دايما عالسوشيال ميديا لكن فيه آراء وحشة بتطلع وأكيد بتضايق منها لكن بحاول أتعلم منها، والسوشيال ميديا ده عالم أنت ما تقدرش تتحكم فيه».
وعن أكثر تعليق استقبلته من الجمهور، قالت: «كذا حد قال ممكن تشتغلي أكتر عالنطق ومخارج الحروف، وقلت ليه أتضايق أو الناس تكون عاوزة تضايقني، وفعلا ابتديت أشتغل مع مدرب على مخارج الحروف».
مواضيع ممكن تعجبك
أحدث الأخبار
