استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنانة نور إيهاب للحديث عن أحدث أعمالها الفنية.
وتحدثت الفنانة نور إيهاب عن أحدث أعمالها السينمائية والمنتظر عرضه وهو «الحريفة 2» بعد نجاح الجزء الأول، وقالت: «ما كناش نعرف إن الحريفة هيبقى له جزء تاني، الجزء التاني شخصية (لانا) فيه لذيذة وبحبها لكن الفرق المرة دي إنها بتلعب كورة، لأني كنت مبسوطة بالأجواء بتاعت الكورة في الجزء الأول، ولما المنتج طارق الجنايني اقترح موضوع الكورة في الجزء التاني اتحمست للموضوع أوي، واتدربت كتير وقعدت كذا شهر أتمرن كورة وكانت تجربة لذيذة، خصوصا إني بحب الكورة بس ما كنتش لعبت كورة في حياتي، ومن بعد تمرين الكورة حسيت إن كل الحاجات اللي هشتغل فيها بعد كده مهم أتعلم حاجة فيها».
وأوضحت نور إيهاب الفروقات التي تشهدها الشخصيات والأحداث في الجزء الثاني من فيلم «الحريفة»، وقالت: «علاقة (لانا) و(ماجد) اتطورت بشكل حلو وبقت لذيذة جدًا، وفيه أدوار كتير كانت حلوة أوي في الجزء الأول مش واخدة حقها والناس كانت نفسها تشوفها أكتر وده اتحقق في الجزء التاني وفيه ناس جديدة انضمت لينا في الجزء التاني فما بقتش البنت الوحيدة في الفيلم، وحاسة إن الدنيا اتفتحت لكل شخصية بطريقة أفضل من الجزء الأول»، مؤكدة أن انضمام ممثلين جدد للعمل سيفيده: «لو فكرت وقلت مبسوطة إني البنت الوحيدة في الفيلم والبنات التانية كانوا هيضيفوا للفيلم ده مش مظبوط، لأنهم لما يضيفوا للفيلم الفيلم هينجح ويتشاف أكتر».
كما تحدثت عن الظهور الخاص لنجم الكرة الإنجليزية مايكل أوين في العمل وقالت: «ظهوره حلو أوي وخفيف ولذيذ ومش استغلال للموقف وخلاص لكن في مكان مناسب في الفيلم وعلى أد اللي الناس هتكون عاوزاه لأن الفيلم ناجح ومش محتاج نعمل حاجات كتير نغلوش بيها على حاجة».
وقالت نور إيهاب إنها تتمنى تقديم شخصيات بها لهجات أو جنسيات مختلفة، موضحة: «نفسي أقدم حاجة فيها لهجة مختلفة أو جنسية مختلفة وبحب أقعد أشتغل على الحاجات دي، وأنا بحب أتعلم حاجات جديدة وببقى مبسوطة بده جدًا».
كما قالت إن أحداث مسلسلها «6 شهور» كثيرة ويمكن أن يخرج منها أكثر من 10 حلقات، مضيفة: «أتمنى يكون فيه جزء تاني».
وعبرت نور إيهاب عن حبها للفنانة ياسمين عبد العزيز: «بحب ياسمين عبد العزيز أوي وأتمنى أشتغل معاها»، كما تمنت العمل مع النجمين كريم عبد العزيز ومنى زكي، وقالت: «أنا اشتغلت رمضان اللي فات في الحشاشين بس ما اشتغلتش مع كريم عبد العزيز وكان نفسي الدور يكون معاه لأني بحبه أوي، ونفسي أشتغل مع منى زكي بعشقها وبالنسبة لي هي حاجة خطيرة وعاوزة أشتغل معاها علشان أتعلم منها بتشتغل إزاي وبتحضر إزاي، وفي كل دور بتفرج عليها ببقى عاوزة أعمل الدور ده أو أبقى أختها في الفيلم».
وعن تعاملها مع مواقع التواصل الاجتماعي، قالت: «مهم الممثل يوري للناس الجانب اللي هم مش عارفينه من خلال السوشيال ميديا لأن الشخصيات اللي بنقدمها مش إحنا فالناس بتبقى عاوزة تشوف طريقتك الحقيقية إزاي وده بيقرب الناس للممثل، لكن أنا الفترة الجاية ممكن أستخدم السوشيال ميديا علشان أقرب للجمهور لكن بطريقة تانية، لأن فيه تفاصيل الواحد ما بيبقاش لازم يوريها للجمهور ففيه جزء لازم يبقى خاص وجزء للجمهور، وده مش بسبب مشاكل حصلت لكن حسيت إني محتاجة أوري الناس جوانب تانية أكتر من حياتي الخاصة اللي مش هتفيدهم بحاجة».
وأوضحت الفنانة نور إيهاب أنها لم تحسم بعد التواجد في رمضان المقبل من عدمه، قائلة: «رمضان الجاي لسه مفيهوش حاجة أكيدة لحد دلوقت، مفيش غير مشروع سينمائي لكن لسه شوية بعد رمضان، ونفسيى لو هكون في رمضان تكون حاجة حلوة ونفسي فيها خصوصا بعد مسلسل 6 شهور».
وعن مشروعها السينمائي قالت: «عندي حاجة قريبة هعملها في السينما لكنها مش بطولة مطلقة لكن الفيلم بيدور حول شخصيتي والقصة مش حقيقية لكن متاخدة من قصص حقيقية لبنات».
مواضيع ممكن تعجبك
أحدث الأخبار
