قبل أيام من طرحه.. هكذا تحدث أبطال «الحريفة 2» عن كواليس تحضيره

تحدث بطلا فيلم «الحريفة 2» نور النبوي ونور إيهاب لـ«نجوم إف.إم» عن كواليس تصوير الفيلم المنتظر عرضه في السينمات المصرية بدءًا من 4 ديسمبر المقبل.

وقال الفنان نور النبوي خلال لقائه في برنامج «أسرار النجوم» مع إنجي علي عبر «نجوم إف.إم»: «فيلم (الحريفة) هو مشروع في قلبي وبداية لكارير مستمر، وعرفت فيه ناس كتير حلوة أخواتي كزبرة وأحمد غزّي وسليم الترك وعبد الرحمن محمد ومنتج كبير زي طارق الجنايني ومخرج الجزء الأول أستاذ رؤوف السيد ومخرج الجزء التاني أستاذ كريم سعد وكل العناصر اشتغلوا بقلبهم وأنا اشتغلت بقلبي علشان يعجب الناس».

وأضاف: «أنا بحب السينما أوي ونفسي أبقى جزء من فيلم من الأفلام اللي اتفرجت عليها وأنا صغير زي (تيتو وكده رضا وأبو علي والديلر) وكنت بروح أشوف أفلام تجارية نفسي أعمل زيها، ونفسي في أفلام تأثر فيا، وأنا مش حاسس إن فيه فيلم ينفع تدخل فيه زي ما تخرج علشان يبقى فيلم حلو».

كما تحدثت الفنانة نور إيهاب عن بعض ملامح الجزء الثاني من الفيلم خلال لقائها في برنامج «عيش صباحك» مع يوسف التهامي وفانا إمام على «نجوم إف.إم».

وأوضحت نور إيهاب الفروقات التي تشهدها الشخصيات والأحداث في الجزء الثاني من فيلم «الحريفة»، وقالت: «في الجزء التاني شخصية (لانا) فيه لذيذة وبحبها لكن الفرق المرة دي إنها بتلعب كورة، لأني كنت مبسوطة بالأجواء بتاعت الكورة في الجزء الأول، ولما المنتج طارق الجنايني اقترح موضوع الكورة في الجزء التاني اتحمست للموضوع أوي، واتدربت كتير وقعدت كذا شهر أتمرن كورة وكانت تجربة لذيذة، خصوصا إني بحب الكورة بس ما كنتش لعبت كورة في حياتي، ومن بعد تمرين الكورة حسيت إن كل الحاجات اللي هشتغل فيها بعد كده مهم أتعلم حاجة فيها».

وتابعت عن ملامح الجزء الثاني: «علاقة (لانا) و(ماجد) اتطورت بشكل حلو وبقت لذيذة جدًا، وفيه أدوار كتير كانت حلوة أوي في الجزء الأول مش واخدة حقها والناس كانت نفسها تشوفها أكتر وده اتحقق في الجزء التاني وفيه ناس جديدة انضمت لينا في الجزء التاني فما بقتش البنت الوحيدة في الفيلم، وحاسة إن الدنيا اتفتحت لكل شخصية بطريقة أفضل من الجزء الأول»، مؤكدة أن انضمام ممثلين جدد للعمل سيفيده: «لو فكرت وقلت مبسوطة إني البنت الوحيدة في الفيلم والبنات التانية كانوا هيضيفوا للفيلم ده مش مظبوط، لأنهم لما يضيفوا للفيلم الفيلم هينجح ويتشاف أكتر».

فيلم «الحريفة 2» من بطولة نور النبوي، كزبرة، أحمد غزي، عبد الرحمن محمد، سليم الترك، خالد الذهبي، ومن تأليف إياد صالح وإخراج كريم سعد.

صورة من حساب الشركة المنتجة للفيلم عبر إنستجرام.