استضاف يوسف التهامي وفانا إمام في حلقة اليوم الخميس من برنامج «عيش صباحك» على «نجوم إف.إم»، الفنان أحمد جمال سعيد للحديث عن أعماله الفنية وأحدثها مسلسل «وتر حساس» الذي يتم عرضه حاليًا.
وقال الفنان أحمد جمال سعيد: «لما باجي ألعب أي شخصية بتاخد مني حاجات كتير وببدأ أفقد حاجات من أحمد جمال سعيد وبكتسب حاجات من الشخصية»، مضيفًا «بحب ثقة شخصية مازن من (وتر حساس) في نفسه وأنت هتكرهه لكنه شخص هيشدك لأنه كاريزما، وفيه صفات بحبها من الشخصيات اللي بعملها فبخليها عندي».
ونفى الفنان أحمد جمال سعيد ارتباط النجاح بموسم رمضان أو غيره، قائلًا: «رمضان أو غير رمضان المسلسل مكتوب له هينجح ولا لأ دي بتاعت ربنا إحنا بنسعى وربنا بيوفق، لكن أكيد دلوقت أحسن توقيت لأن ربنا اختار له ده، وأنا بالنسبة لي المهم الورق لأن العمل الحلو في رمضان أو غير رمضان الناس هتقعد تتفرج عليه، والناس بتتفرج أهو على وتر حساس كأننا في رمضان».
وعن أنواع الشخصيات التي يتمنى تقديمها خلال الفترة المقبلة قال «نفسي أعمل أكشن لايت كوميدي أو رومانسي أو رومانسي مع لايت كوميدي».
واختار أحمد جمال سعيد أعمال جدّه الفنان الكبير فريد شوقي ضمن قائمة الأعمال القديمة التي يتمنى تقديمها، مضيفًا: «كمان محمود عبد العزيز، وبالنسبة لي الراجل ده ما كانش طبيعي ومعملش دور غلط، ولو حتى العمل ما نجحش هو دوره هينجح، وكنت بتخض هو بيعمل ده إزاي وإزاي بيحافظ عليه، ومفيش مشهد عنده غلط».
وأكد أن الجيل الحالي من الفنانين الشباب داعم لبعضه في سياق المنافسة، مضيفًا: «إحنا جيل طالع وكلنا في ضهر بعض وكلنا هننجح وكلنا مبسوطين لبعض وده زي زمان، وأنا مش هزعل إننا ننافس بعض لأن في الآخر الجمهور هو اللي هيكسب، وأنا مثلًا واحد من الناس اللي نرفزوني السنة اللي فاتت وعمل دور حلو أوي هو محمد علي رزق في صيد العقارب».
وكشف عن الأعمال المقبلة التي يحضر لها حاليًا وهي: «عندي كامل العدد الجزء التالت في شخصية (دكتور طارق) في رمضان، وفيه حاجة تانية لسه في التحضيرات في السينما وكمان مسلسل في رمضان».
كما وجه الشكر لكل فريق عمل مسلسل «وتر حساس» ووجه لهم رسالة قائلًا: «بشكر كل الناس اللي كنوا معايا في وتر حساس بدون استثناء.. شكرًا لأن الرحلة دي مش هنساها».
كما عبّر عن تفاؤله وشكره لتواجده في «نجوم إف.إم» وبرنامج «عيش صباحك» وقال: «أنا بتفاءل بالمكان ده وبحبه.. وشكرًا لشطارتكم جدًا وببقى مبسوط وأنا معاكم».
مواضيع ممكن تعجبك
أحدث الأخبار
