حلت الفنانة لقاء سويدان ضيفة على برنامج «عيش صباحك» على «نجوم إف.إم» مع يوسف التهامي وفانا إمام، للحديث عن مشوارها الفني وأحدث أعمالها الفنية.
الوصفة السحرية
وبدأت الفنانة لقاء سويدان من مسلسلها الأحدث وهو «الوصفة السحرية» وقالت عن دورها: «ربنا هو اللي بعت لي الدور ده، أنا كان بقالي كتير ما اشتغلتش اجتماعي كوميدي، والدور حلو أوي، والمنتج الفني للعمل هو اللي كلمني إنه فيه دور مختلف وعاوزيني فيه وهنصور بعد أسبوع وكان مكتوب 10 حلقات والشخصية كان الشكل بتاعها واضح والقضية أحب أتكلم فيها، اللي هي الست اللي اتطلقت أكتر من مرة وإزاي الناس بتتعامل معاها وهي عقلها حر وست مثقفة وكنت حابة أعالج القضية دي، لأني طول الوقت شايفة الناس حاطه تابوهات كده لا ليها علاقة بدين ولا أخلاق هي موروثات بتقيدنا وتحطنا في قوالب، وتناقشت مع المخرج على شكلها وإزاي يدل على حرية الشخصية».
التشابه بين شخصية هانيا ولقاء سويدان
كما تطرقت لعلاقة شخصيتها في العمل بالأزواج السابقين، وكيف أن هذا الأمر يشبه حياتها في الواقع، موضحة: «أنا عندي بنوتة عندها 19 سنة وعلاقتي كويسة جدا بأبوها لدرجة إنها بتقول لي لما أنتم بتحبوا بعض كده سبتوا بعض ليه قلت لها مش شرط إني بحبه وأحترمه وعمري ما قلت عليه كلمة مش كويسة قدامها، هي مالهاش علاقة بعلاقتي أنا بيه وده الصح إذا إحنا بنحب ولادنا لازم نخلي علاقتهم كويسة بوالدهم».
وأوضحت الفنانة لقاء سويدان علاقتها بزملائها خلال كواليس تصوير العمل خاصة وإن العمل يضم 6 فنانات في بطولته، وقالت: «ما بيبقاش فارق معايا أوي إن يكون فيه حاجة بيني وبين الناس لأني علاقتي كويسة أوي بزمايلي وكانت أول مشاهد جمعتني مع إسلام جمال وبسمة داوود وبانت الأجواء من أول تعامل، وأنا ما يهمنيش الشخص لكن يهمني الممثل، وبعد أول أسبوع تصوير بقينا مش عاوزين نروح، بنستنى بعض نتغدى سوا ونقعد نتكلم كبنات مع بعض ونتفرج على مشاهد بعض».
السوشيال ميديا
كما أكدت عدم اهتمامها بالسوشيال ميديا كمصدر أولي لردود الفعل على أعمالها، موضحة: «ما بعتمدش على السوشيال ميديا في ردود الفعل لكن بعرف رد الفعل من الشارع، والنجاح الحقيقي إنك لما تلاقي الناس مصدقة الشخصيات بجد، لكن ابتديت أتعلم شوية السوشيال ميديا في إنستجرام وتيكتوك علشان أقرب من الجيل الجديد».
مواضيع ممكن تعجبك
أحدث الأخبار
