كشف المهندس رامي رزق الله، نائب رئيس مجلس إدارة مجموعة «سافوي جروب» تفاصيل مسابقة Egypt Got Talent المقرر إقامتها بمدينة شرم الشيخ، خلال مداخلة هاتفية لبرنامج «عيش صباحك» مع يوسف التهامي وفانا إمام على «نجوم إف.إم».
وقال المهندس رامي رزق الله، نائب رئيس «سافوي جروب»: «في سوهو سكوير ابتدينا قبل كده برنامج (شرم جوت تالنت) لأن المنطقة ترفيهية وتعد الأجمل في شرم الشيخ، فعملنا المسابقة لأربع سنين، وكان من نجوم المسابقة عمر كمال وأبانوب فليكس وكل دول بيرجعوا وبنعمل معاهم عقود».
وأضاف نائب رئيس مجلس إدارة مجموعة «سافوي جروب»: «قررنا نوسع الدايرة ونعملها (إيجيبت جوت تالنت) علشان تكون أوسع وأشمل، لأن فيه مواهب كتير ما بتقدرش تلاقي فرصة فالهدف الأساسي اكتشاف المواهب الجديدة ونديهم فرصة يطلعوا ويعرضوا للجمهور ونعمل معاهم عقود إنهم يقدموا موهبتهم على مسرح سوهو سكوير اللي بيبقى فيه حوالي ألفين متفرج يوميًا».
كما تحدث المهندس رامي رزق الله عن جوائز المسابقة وقال: «راصدين جوائز مالية كويسة جدا وده دور مجموعة سافوي إنها بتمول الجوايز المالية وكل مستلزمات المسابقة علشان تطلع بالشكل المطلوب.. والجوائز هي 3 آلاف دولار للمركز الأول وألفين دولار للمركز الثاني وألف دولار للمركز الثالث».
وعن كيفية التقديم للمسابقة، أوضح: «فيه لينك يقدر صاحب أي موهبة يقدم عليه، بيبعت فيديو قصير لموهبته، وبيتم الاختيار من بين الفيديوهات من قبل لجنة التحكيم للمتسابقين اللي ممكن يشتركوا في الأسبوع الأول والتاني والتالت وهكذا والمسابقة مفتوحة لكل المواهب مش موهبة معينة، ولجنة التحكيم تضم متخصصين في مجالات مختلفة بينهم: المخرج المسرحي أحمد طه، والموزع والملحن كريم عرفة».
وأكد المهندس رامي رزق الله، نائب رئيس «سافوي جروب»، تطلعاتهم لتكون مسابقة Egypt Got Talent مسابقة سنوية ودولية أيضًا، قائلًا: «عاوزين نطلع ونعلى بمستوى المسابقة تكون حدث لمدينة شرم الشيخ هدفها الأهم تنشيط السياحة واكتشاف المواهب الجديدة، وإحنا شايفين النجاح اللي عمله مهرجان العلمين، فإحنا بنحاول نكبر المسابقة علشان تكون حدث دولي بتدعيم من هيئة تنظيم السياحة وممكن يكون برنامج ويذاع في القنوات الفضائية»، مشيرًا إلى أن «سوهو سكوير هي أهم منطقة ترفيهية وسياحية في شرم الشيخ وحائزة على جائزة أفضل منطقة سياحية للأسرة في سنة 2010 لما تتمتع به من أنشطة لكل أفراد الأسرة، فالمسابقة هتكون مهمة جدًا لأن السياحة محتاجة التنوع ده».
مواضيع ممكن تعجبك
أحدث الأخبار
