تحدث شريف جويفل في برنامج التكنولوجيا «X.O» على «نجوم إف إم»، اليوم الثلاثاء، عن بداية ظهور أجهزة «لابتوب» وتطورها حتى الآن.
وقال شريف جويفل: «اللابتوب هو جهاز كمبيوتر محمول , و معروف كمان باسم نوت-بوك ! كلمة Lap بالانجليزي يعني حِجر) فا اللابتوب متصمم عشان المستخدم يقدر يحطه على حجره و هو بيشتغل ! على عكس كمبيوترز الدسيكتوب اللي لازم تكون محطوطة على مكتب او Desk علشان تقدر تستعمله ! و لأن اللابتوب جهاز محمول … لازم يكون جواه بطارية بيشتغل بيها عدد ساعات معين من غير ما يحتاج لأي كهرباء».
وتابع: «حكاية اللابتوب ابتدت بعد ما ظهر الكمبيوتر الشخصي في السبعينات ، ظهرت فكرة اللابتوب أول مرة سنة 1972 ! و اللي اتكلم عنها كان مهندس اسمه آلان كاي (Alan Kay). كان عنده رؤية لجهاز كمبيوتر محمول يمكن استخدامه بسهولة في أي مكان ، ودي كانت بداية فكرة اللابتوب اللي احنا عارفينه النهاردة . سنة 1973 ، عرضت شركة IBM مشروعها اللي كان اسمه IBM SCAMP project. المشروع ده كان محاولة لتطوير جهاز كمبيوتر محمول جديد تماما و أنتجوا أول نموذج له. وبدأ التسويق لأول لابتوب سنة 1975 و كان اسمه IBM 5100 ، و وزنه كان 23 كيلو جرام ! طبعا ده وزن كبير جدا بالنسبة لمعايير النهارده ! لكن الجهاز ده كان بداية مهمة جدا في تاريخ الكمبيوترات المحمولة».
وأضاف جويفل: «في سنة 1981، اتصنع أول لابتوب خفيف وصغير في نفس الوقت واللي أنتجته شركة أبسون وكان اسمه Epson HX-20. الجهاز ده كان مميز جداً لأنه كان مزود بشاشة LCD وبطارية قابلة للشحن و كان معاه printer حجمها صغير كمان ! و كان وزنه حوالي 1.6 كيلوجرام بس، وفي نفس السنة، شركة أوزبورن قدمت جهاز Osborne 1 , اللي كان أول كمبيوتر محمول حقيقي بس كان وزنه حوالي 11 كجم وكان شكله شبه الحقيبه او الشنطة كبيرة ! و مع ذلك … قدم تجربه مهمة جدا للأعمال التجارية و المهنيين اللي بيحتاجوا التنقل. جهاز Osborne 1 … ما كنش ناجح تجاريا بشكل كبير ، لكنه فتح الباب لفكرة الكمبيوتر المحمول او اللابتوب بشكل عام. بعد كده جات IBM وأطلقت جهازها الشهير IBM 5155 سنة 1984 ، و الجهاز ده عمل نقلة مهمة لانه كان أخف شوية من Osborne 1 و كان بيشتغل بنفس كفاءة الكمبيوترات المكتبية في الوقت ده ، و ده اللي خلي ال IBM 5155 اختيار مناسب جدا لكتير من الشركات والأفراد».
وأضاف شريف جويفل: «في 1989 ، شركة Apple دخلت سوق أجهزة اللابتوب بجهاز اسمه Macintosh Portable. الجهاز ده كان أول لابتوب من انتاج أبل ! لكن مشكلته انه كان ثقيل و ثمنه غالي جدا ! ومع ذلك كان بيقدم أداء عالي جدا مقارنة بالأجهزة اللي كانت موجودة وقتها . و بعدين ظهرت شركة Compaq في الصورة و انتجت جهاز Compaq LTE سنة 1989، اللي كان يعتبر أول لابتوب بالحجم والوزن اللي بنشوفهم دلوقتي . و في 1991، شركة IBM عملت نقلة قوية جدا لما انتجت جهاز ThinkPad 700C. الجهاز ده كان مختلف عن أي حاجة قبل كده ، لأنه قدم تصميم جديد بشاشة ملونة و إمكانية الطي بالكامل، و ده كان أول لابتوب تقدر تفله و تفتحه بالطريقة دي ! و كمان اضافت ميزة ال TrackPoint اللي كانت ابتكار جديد تماما في وقتها ! ال Trackpoint دي اللي هي الانالوج ستيك اللي بتكون موجودة في نص الكيبورد او لوحة المفاتيح و بتعمل عمل الماوس بالظبط ! و موجودة لحد النهاردة في بعض أجهزة لينوفو».
واستطرد: «في 1999 ، آبل أطلقت جهاز ال iBook … و الجهاز ده كان أنيق و فعلا شكله كان شيك جدا ! و كان موجه للمستخدمين العاديين أكتر من المحترفين ، و ال ibook كان أول جهاز يدعم Wi-Fi بشكل كامل ! و عامة في فترة اخر التسعينييات و اول الافينات حصل طفرة في صناعة اللابتوبس … و بقي عندنا موديلات مختلفع من شركان كثير جدا ! و كلهم كانوا بينافسوا بعض علي انتاج احسن تصميم و اسهل استخدام … و سهولة التعامل … و أوقات البطارية تزيد عشان الشغل».
واستكمل شريف جوفل حديثه عن تطور أجهزة لابتوب: «في سنة 2008، آبل قلبت الموازين مرة تانية مع جهاز MacBook Air اللي كان أنحف و ارفع لابتوب في العالم في الوقت ده. الجهاز ده مكنش فيه محرك أقراص أو منافذ كتير، لكنه قدم تصميم جميل وعمر بطارية طويل. وفي 2012، مايكروسوفت قدمت جهاز ال Surface اللي كان عبارة عن مزيج ما بين التابلت و اللابتوب، و الموضوع ده قدم مفهوم جديد تماما لفكرة استخدام الأجهزة المحمولة، و بعد كده الأجهزة تنوعت جدا و بقي في أجهزة للشغل العادي او الشغل الثقيل او الجيمينج كمان ! و في أجهزة بتقدر تعمل كل ده مع بعض».
صورة من Freepik
مواضيع ممكن تعجبك
أحدث الأخبار
