يُكمل المخرج الكبير خيري بشارة عامه الـ77 اليوم 30 يونيو في عيد ميلاده.
وفي تلك الذكرى نستعرض سويًا علاقته بـ3 نجوم كبار في عالم الفن والغناء قدّم معهم عدد من أبرز أفلامه، وذلك من لقائه السابق لـ«نجوم إف.إم» عبر برنامج «أسرار النجوم» مع إنجي علي.
وعن علاقته بالفنان الكبير أحمد زكي وخاصة مع تعاونهما في فيلم «كابوريا»، حكى: «إحنا كنا صغيرين وما كناش بنحسس على بعض كنت ساعات ببقى مؤلم ليه وكان بيتحملني زي ما كنت أنا بتحمله، وفي فيلم كابوريا تحديدا تحديته يمضي الفيلم على بياض وقال مش همضي وقلت له لا هتمضي وفي الآخر مضى، وقبل التصوير بيومين قال لا مش هحلق حلقة تايسون في كابوريا، قلت له مش هتحلق مفيش فيلم وكنت واخد الحلاق معايا الفندق، لكن بعد ساعات كان خارج بالحلقة».
وأضاف: «أنا جايز زعلته في حياتي أكتر ما هو زعلني هو حد طيب جدا وكريم جدا لدرجة مزعجة، ورقيق جدا ودائما فيه ظلم ليه».
كما تحدث عن لقائه الأول بالفنان محمد فؤاد واختياره له في فيلم «أمريكا شيكا بيكا» وقال: «محمد فؤاد التقيت بيه لأول مرة في جامعة الدول العربية، لقيته جالي بيقول لي (إحنا برده بنعرف نمثل يعني)، فلما دخل عليا الدخلة الغريبة دي وطريقة الكلام شوفت بطل فيلم أمريكا شيكا بيكا وكلمت المنتج محمد العدل فورا، ورحب جدا جدا وكان اختيار بصراحة هايل».
وكذلك حكى عن تجربته في التعاون مع الفنان عمرو دياب في فيلمه الشهير «آيس كريم في جليم»، وقال: «عمرو دياب كنا في سنة 1991 هو كان صغير وأنا كنت صغير وإحنا الاتنين عندنا ثقة في نفسنا، وجماله إنه عارف إني مش من جمهوره وأنا اختارته لأني عملت استفتاء بين الشباب مين المطرب اللي بتحبوه فقالوا لي عمرو دياب، فأنا جبته لأني كنت بناقش في الفيلم حاجات صعبة زي سقوط االتحاد السوفييني والناصري واللامنتمي، وهي قضايا مهمة ولو الفيلم جاد ممكن تخلي الفيلم يسقط، بس أنا حطيته في إطار الناس تبلعه وتتفاعل معاه وكنت عاوز أبين إزاي مصر بتتغير».
وتابع: «عمرو دياب في الفيلم سلم لي نفسه وكانت روحه شديدة الجمال وشيرين رضا وقتها كانت عاوزه تقول رأيها في اللبس اللي أنا بختاره فهو قال لها هو عنده رؤية في ذهنه سيبيه يعمل اللي هو عاوزه، فقلت له لا أحب أسمع رأيها، وأنا كنت عاوز أعمله شبه جيمس دين بالجاكيت الجلد».
صورة من حساب المخرج خيري بشارة على فيسبوك
مواضيع ممكن تعجبك
أحدث الأخبار
