استضاف الإعلامي يوسف الحسيني في حلقة، يوم الأحد، من «حروف الجر» على «نجوم إف.إم»، المخرج محمد محمود، رئيس مهرجان الإسكندرية للفيلم القصير.
وقال المخرج محمد محمود: «اللي حببني في السينما هي الحواديت، لأن في وقت الفيلم بتشوف دنيا تانية والدنيا دي أنت موافق عليها، لأنك في الوقت ده بايع وقتك وذهنك للمؤلف والمخرج فهناك متعة في الموضوع».
وتابع: «كل الشباب اللي قابلتهم كان نفسهم يمثلوا وعاوزين يعبروا قدام الكاميرا وأنا كان نفسي أمثل لكن مالقتش نفسي في هذا الأمر، وبعدين قعدت شوية لقيتني حابب أكتر إني أحكي الحدوتة».
وتحدث عن بداية فكرة تأسيس مهرجان الإسكندرية للفيلم القصير، وقال: «أنا ومجموعة من صناع الأفلام في الإسكندرية والمهتمين بالسينما من شباب في أوائل العشرينيات وبنخرج أفلام قصيرة فجت لنا الفكرة في 2014 وطلعت أول دورة سنة 2015، وقررنا إننا نعمل مهرجان دون وعي يعني إيه مهرجان، كل اللي فكرنا فيه إننا هنجيب أفلام من الدول العربية ونعلن على فيسبوك ونشوف مكان يستضيف الدورة، وكان كله جهد ذاتي في أول كام دورة».
وأضاف: «إحنا بنستهدف المواطن العادي واللي هو عبارة عن طلبة وموظفين فعروضنا بتبدأ متأخر من 6 مساء ومقسومة على برنامجين، فأي وقت هيكون فيه عروض فالفكرة إن دايما يكون فيه ناس داخلة وخارجة بتشوف عروض».
وعن اختيار الأفلام المشاركة في المهرجان، قال: «فيه إدارة فنية ولجنة اختيار الأفلام هي اللي بتحدد الأفلام المشاركة وأنا بتدخل بس في وقت الاحتداد أو الاختلاف على اختيار ما» مضيفًا: «آلية الاختيار مختلفة فيما يخص الموافقة من الرقابة لأن اللي بيحضر المهرجان عندنا هو جمهور عام».
كما تطرق إلى الدعم المادي للمهرجان، موضحا: «في البداية كنا إحنا اللي بنصرف على المهرجان وكانت الأمور بسيطة في سنة 2015 فكنا أول دورتين نصرف على المهرجان إلى أن دخلنا تحت مظلة وزارة الثقافة من خلال د. محمد العدل الذي أصبح الرئيس الشرفي للمهرجان، وبدأنا مع الوزارة إن يكون فيه دعم بسيط علشان المهرجان يظهر بشكل أحسن إلى أن وصلنا للدورة العاشرة وإن فيه داعمين يمكن مش كتير، من خلال شركات عندها وعي لدعم الفنون والفيلم القصير، والمهرجان بيكبر والميزانية ما زالت صغيرة لذلك بنسعى يكون فيه راعي للمهرجان».
وتابع المخرج محمد محمود: «إحنا كمان أضفنا برنامج سينما للمكفوفين لأول مرة بالتعاون مع وزارة التضامن الاجتماعي، وهي تجربة جديدة يمكن حصلت بس قبل كده في المغرب».
وأشار: “المساعدة المنتظمة تأتي لنا من النقابة، وفريق عمل المهرجان كله من المتواجدين بالإسكندرية ويقومون بأعمالهم دون مقابل ويتم عملها بحرفية شديدة وهذا من إيمان الناس بالمهرجان، وإننا مسؤولين عن مهرجان كبير وهذا يشجع الناس لكي يظل المهرجان مستمرا وفيه إيجابية شديدة، وطبعا إن الفريق من الإسكندرية هذا يقلل على الكثير من نفقات الانتقالات”.
مواضيع ممكن تعجبك
أحدث الأخبار
