فريدة سيف النصر لـ«أسرار النجوم»: «شخصية سُترة فيها كتير منّي.. ومش حاسة إني عملت أفضل ما عندي»

استضافت إنجي علي في حلقة اليوم من «أسرار النجوم» على «نجوم إف.إم» الفنانة فريدة سيف النصر للحديث عن أحدث أعمالها الفنية.

رسالة لفريق العتاولة

وأرسلت رسالة إلى فريق عمل مسلسل «العتاولة» في رمضان الماضي، وقالت: «بحبكم بجد وأديت كل اللي في قلبي بجد وأتمنى النجاح للكل بجد اللي بيحب ربنا بيعرف المحبة وبيحب كل اللي خلقه ربنا والروح اللي حاطتها في أي جسد، ما دام جواكي رحمة يبقى جواكي حب، وأكيد ربنا هيبقى في ضهرك، وأنا بقعد أشكر ربنا وبتخض من الحب وبلاقي مظاهرات لشباب تحت البيت عاوزين يتصوروا معايا، فأنا بقول لهم إني بحبهم رغم إني زعلانة لأني حبيت سترة وماتت».

رسالة لـ باسم سمرة

كما عبرت عن استيائها من تجاهل ذكر اسمها في بعض اللقاءات ضمن فريق العمل، موجهة رسالة للفنان باسم سمرة: «شكرا يا أستاذ باسم لأنك الوحيد في كل الإنترفيوهات بتجيب سيرتي»، مؤكدة أن تجاهلها يعد إهانة لها.

رسالة سُترة لـ فريدة

ووجهت رسالة لنفسها بلسان شخصيتها في العمل (سترة)، وقالت: «أنتي تعبتيني معاكي لأنك فاكرة كل الناس أبيض وبتقولي كل حاجة كويسة، اتعلمي تقعدي  وتعملي بريستيج».

وتابعت: «أنا مش حاسة إني عاملة أفضل ما عندي ما كانش عندي فرصة لده لأن كان فيه كاست كبير جدا فأنا كنت بعافر إني أعمل شغلي صح وأنا كنت وقتها سترة بجد مش فريدة».

وأكدت: «سترة بالنسبة لي فيها كتير مني وأي شخصية قبلتها وحبيتها فيها مني، زي أصيلة في بدون ذكر أسماء، وأنا أي عمل بيفضل معايا شوية بعد ما يخلص».