«قبل ما تفطر بكتير»| مدير تنمية الأعمال بالبنك الأهلي المصري توضح الخدمات غير المالية لرواد الأعمال

استضاف يوسف التهامي ولينة الطهطاوي في حلقة الثلاثاء من «قبل ما تفطر بكتير» على «نجوم إف.إم» برعاية البنك الأهلي المصري، شنتال صباغ مدير عام قطاع تنمية الأعمال والخدمات غير المالية بالبنك الأهلي المصري.

وعرّفت شنتال صباغ مدير عام قطاع تنمية الأعمال والخدمات غير المالية بالبنك الأهلي المصري، الخدمات غير المالية التي يقدمها البنك وقالت: «هي الخدمات اللي بتساند الشركات الصغيرة والمتوسطة إنها تحصل على تمويل لأن مفيش شركة هتكبر بفلوسها هي، لأن مع التوسع هتحتاج موارد تانية علشان تكبر والشركات بتتجه للقرض ووقتها بنلاقي الشركات ناقصها حاجات كتير فالخدمات غير المالية بتخلي الشركة مؤهلة للحصول على القرض، وبتوصّل صاحب الشركة إنه يبقى متطمن ويكون فيه نظام عمل ووعي».

وتابعت: «أصحاب الشركات ما بيبقوش مولودين بيعرفوا يديروا، ومحدش لوحده هيعرف يعمل كل حاجة وبيبقى بيحتاج مساعدة من جهات مختلفة ودي حاجة طبيعية، وبالتالي فيه جهات بتساعدك في ده بشكل مجاني أو غير مجاني، والبنك الأهلي المصري عنده خبرة قديمة وطويلة في التعامل مع المشروعات الصغيرة والمتوسطة، من خلال 650 فرع وخبرة في قطاعات مختلفة، وعدد عملاء كبير جدا في مجالات وخبرات مختلفة، فأنت بتيجي للبنك الأهلي لأنه بيت خبرة وده نادرًا ما هتلاقي مشروع ما عداش على البنك قبل كده، والبنك الأهلي عنده شراكات مع جهات مانحة دولية بتقدر تقدم خطوط تمويل بشروط ميسرة، وكمان محفظة المشروعات الصغيرة والمتوسطة للبنك فيها 130 ألف عميل بأكتر من 145 مليار جنيه مصري».

حاضنات الأعمال

كما أوضحت مدير تنمية الأعمال والخدمات غير المالية بالبنك الأهلي المصري: «إحنا بنحاول الوصول لأكتر من عميل عنده نفس المشكلة، وطريقة من طرق الوصول دي هي حاضنات ومسرعات الأعمال لأنهم بيبقوا عملوا شغل مع أصحاب الأفكار والمشروعات الصغيرة، كمان من خلال شراكات مع مؤسسات زي الأكاديمية البحرية للتكنولوجيا وبنشتغل معاهم في كذا جامعة مصرية».

الموقع الإلكتروني

وأكدت أن: «الموقع الإلكتروني للبنك هو وسيلة اتصال مهمة جدا مع العملاء خصوصا في المجالات المتخصصة، والبنك بيعمل شراكات مع البنوك الأجنبية والجهات المانحة لأنها بتكون عندها دراسات وأبحاث وخبرة تقدر تنقلها للجهات اللي بتعمل معاها شراكات وبالتالي تنتقل لعملاء البنك الأهلي من خلال استشارة أو تدريب أو معلومات عن أسواق تانية»

التمويل الأخضر

كما تحدثت عن فكرة التمويل الأخضر التي يتبعها البنك، وقالت: «ده كله بييجي في ظل الاتجاه لتوفير الطاقة والحفاظ على البيئة ومسئولية البنك إن الشركات توظف فلوس التمويل توظيف مسئول، ولذلك بنوفر للعملاء البدائل الخضراء للطاقة للتقليل من الانبعاثات الكربونية والحفاظ على البيئة».

وعن طرق تواصل أصحاب الأفكار والمشروعات مع البنك، قالت: «للعملاء اللي أول مرة يتعاملوا مع البنوك بيتوجهوا لمراكز رواد النيل في 14 مركز داخل الفروع موجود عناوينهم في الموقع الإلكتروني، إلى جانب خط ساخن 15011 لأي معلومات عن الخدمات غير المالية وإيه المتاح في الخدمات المالية، كمان فيه خاصية لحجز ميعاد بمراكز رواد النيل إلكترونيا من خلال الموقع الإلكتروني، والعمل مع البنك بشكل رسمي يحتاج أوراق رسمية وقانونية، وده بتساعد فيه مراكز رواد النيل من خلال تقييم الفكرة والمشروع».