عمر شرقي لـ«عيش صباحك»: مخرج «بين السطور» كان «مرن» في تحضيرات شخصيتي واشتغلت على «اللوك» بنفسي

استضاف يوسف التهامي وفانا إمام في حلقة الخميس من «عيش صباحك» على «نجوم إف.إم» الفنان الشاب عمر شرقي للحديث عن أحدث أعماله الفنية.

وانطلق عمر شرقي من الحديث عن أحدث أدواره المعروضة وهو شخصية «رامي» من مسلسل «بين السطور» مع الفنانين أحمد فهمي وصبا مبارك ومحمد علاء. وعن ترشيحه للدور قال: «عملت أوديشن على دور تاني هو دور بكر اللي عامله عمرو جمال، وبعد ما عملت وخلصت ومشيت، وبعد فترة لقيتهم بيقولولي إنهم عاوزيني في دور في المسلسل بعد ما افتكرت إني اترفضت، وإنهم عاوزيني في دور تاني وهو دور رامي، وروحت قعدت مع المخرج وائل فرج وقعدنا اشتغلنا على حاجات كتير في الدور وأول مرة أقعد مع مخرج مرن بالدرجة دي وبيسيبني أعمل الحاجات اللي نفسي فيها في الدور».

وعن مظهر الشخصية الذي ظهر به، قال: «اشتغلنا على اللوك بتاعه واختارنا اللبس والتاتو وكنت بصور وببعت للمخرج في كل خطوة، ووصلت لإن الستايلست كان بيدخل يلاقيني تمام مش محتاج تظبيط».

وعن علاقته بالفنان أحمد فهمي في العمل، قال عمر شرقي: «كنت بخاف وبفتكر إنه نجم وهيبقى تنك وكنت بتجنبه لغاية ما روحت يوم ما كانش عندي تصوير في يوم الفركش ولقيته وكان مشهده مع صبا وبعد ما خلص وقف وناداني بصوت عالي وقال لي شرقي بحبك جدا، وسلم عليا وخدنا أرقام بعض وكلمني وقال لي فيه مشهد ليك كان حلو جدًا».

ثم تطرق لدعم الفنان أحمد فهمي له في مسلسل «ألفريدو»، وأوضح أن ترشيحه للعمل كان من مؤلفه عمرو محمود ياسين ثم الفنان أحمد فهمي الذي تحمس له وأيّد الترشيح.

مسلسل «بين السطور» هو النسخة المصرية للمسلسل الكوري Misty، قامت بالمعالجة الدرامية والإشراف على الكتابة السيناريست نجلاء الحديني، تطوير ورشة سرد، إخراج وائل فرج، وبطولة صبا مبارك، أحمد فهمي، محمد علاء، وليد فواز، ناردين فرج، باسل الزارو، علي الطيب ودنيا المصري.