حسني شتا لـ«عيش صباحك»: بقدم دور مغني «راب» في «درويلة» واتعلمت كتير من الأستاذ محمود حميدة

استضاف يوسف التهامي وفانا إمام في حلقة الخميس من «عيش صباحك» على «نجوم إف.إم»، الفنان حسني شتا للحديث عن أحدث أعماله ومشواره الفني.

فيلم درويلة

وتحدث عن أحدث أفلامه وهو فيلم «درويله» المنتظر عرضه، وقال: «كلمة درويلة مصطلح دارج دلوقت معناها متاهات، والشخصية اللي بلعبها هي (بيتو) هو عاوز يبقى مغني راب وهو ابن الأستاذ عمرو عبد الجليل وهو مالك مكان بيبيع حاجات غير قانونية وطايش شوية وبيعمل حاجات من دماغه فبيقرر إنه يغني والفيلم إن شاء الله نازل في يوم 7 فبراير».

وتابع: «أنا مش سميع راب أوي يمكن بس من أيام إيمينم، لكن ممكن أسمع الأغنية المسمّعة لكل رابر دلوقت بس، فشوفت ستايل لبس كل واحد منهم وفي الآخر خلقت شخصية مش شبه حد فيهم.. وأنا صوتي حلو وممكن أؤدي، وأنا بالنسبة لي الشخصية هي اللي بتحركني، واللي بيغني راب دلوقت مش لازم صوتهم يبقى حلو لكن الكلمات جميلة واللحن».

دور كوميدي وموسيقى كئيبة

وعن كيفية تحضيره للشخصيات، أوضح الفنان حسني شتا: «لو فيه دور كوميدي أو دمه خفيف بقعد أذاكر الشخصية على مزيكا كئيبة، معرفش إزاي، بيبقى مودي كده، يمكن لأني بلعب الشخصية الكوميدي من ناحية شر البلية ما يُضحك.. وفيه إضافات بتحصل لأن مهما كان المكتوب الممثل لما يوصل لتفاصيل الشخصية فيه حاجات بين السطور ممكن أضيفها وإلى حد ما بعمل كده، وفي الشارع الناس بيبقوا لامسين ده في بعض الأدوار بالذات الشعبية».

محمود حميدة

كما تحدث عن أبرز ما تعلمه من الفنانين الذين شارك معهم، وقال: «أنا بتعلم من الصغير قبل الكبير، وأنا هفضل أتعلم لآخر نفس في عمري، لكن الأستاذ محمود حميدة اتعلمت منه حاجات كتير من ضمنها الالتزام وقدسية العمل اللي بتشتغله فكنت بتابعه في مسلسل الأب الروحي في التفاصيل اللي مالهاش دعوة بالتمثيل لأني ما بحبش أتأثر في التمثيل بحد لكن ممكن أتأثر بأنماط الشخصيات وتطلع في الآخر من معملي كممثل، ومحمد رمضان اكتشفت فيه حاجة في فيلم هارلي ومسلسل جعفر العمدة، إن محمد رمضان طول الوقت عنده إحساس المحارب، لكن دي عندي برده من زمان إن حتى لو هعمل مشهد إزاي أخلق عالم للشخصية حتى لو هقول جملتين».