استضافت فانا إمام في حلقة الخميس من «عيش صباحك» على «نجوم إف.إم»، الفنان كريم قاسم، للحديث عن أحدث أعماله الفنية مسلسل «زينهم» بالتوازي مع عرض آخر حلقاته.
وقال كريم قاسم: «أنا من الممثلين اللي بعض الناس بيقولوا عليه متعب واللي واثق في موهبته بيحبه جدًا، لأني بقعد أشتغل كتير وأرجع للمخرج وأقترح عليه حاجات وبقول رأيي بصراحة بحكم خبرتي ودراستي.. وفكرة إنك بتشتغلي مع ناس مألوفة اشتغلت معاها قبل كده أو ناس مش مألوفة لكن موهوبين وبيحبوا شغلهم دي حاجة لقيتها في زينهم وكنت مفتقدها من فترة».
وعن متابعة الأطفال للمسلسل علّق قائلًا: «اتخضيت من جمهور الأطفال اللي بيتفرج عالمسلسل وطايرين بيه وحل الألغاز وفي نفس الوقت مهتمين بالجانب الاجتماعي بالشخصيات مع أمهاتهم وأهلهم والعلاقات في بيوت جيمي وزينهم، والأطفال في رأيي هم أصعب جمهور خصوصا اليومين دول لأنهم عندهم مشكلة في التركيز فإنه يقعد يركز في حلقة نص ساعة دي حاجة صعبة، وكمان ذوقهم صعب جدًا لأنهم يا يصدقوا أوي يا إما لأ فمش هتعرف تضحك عليهم».
وأضاف: «ما كنتش متوقع ردود الأفعال دي ولا حد فينا لأننا بنعمل حاجة جديدة ومختلفة لأنه لما المخرج عرض عليا وقال لي عندنا موضوع كوميدي على رعب فاستغربت وقريت لقيت نفسي بضحك وحابب الشخصيات وفجأة على قفلة تخض واللي بعدها وهكذا».
وعن تحدي استخدام الكوميديا مع الإثارة والرعب، قال: «قلت لداوود هنحاول نعمل حاجة بين الكوميديا والواقعية والكوميديا مكتوبة بشكل كاريكاتيري غير تقليدية بس لازم الناس تصدقهم وكان ده التحدي».
وقال كريم قاسم: «نفسي يبقى فيه جزء تاني لأني نفسي أشتغل مع كل الناس اللي اشتغلت معاها في مشروع تاني لأنها كانت من ألطف الكواليس وحابب أرجع تاني نشتغل مع بعض بس بعد ما نريّح بقى شوية لأن آخر يوم صورنا 18 ساعة وكنت بسافر علشان أكمل تصوير ولاد رزق فكنت تعبان ومجهد».
كما تحدث عن مشاريعه الجديدة: «لحد دلوقت بصور ولاد رزق 3 مشاهد أكشن في السعودية وهنرجع نصور في مصر من يناير وإن شاء الله نخلص قبل العيد».
مسلسل «زينهم» بطولة أحمد داوود، كريم قاسم، سلمى أبو ضيف، هناء الشوربجي، محمد أبو داوود، أحمد الرافعي، عماد رشاد، وآخرين، تأليف محمد سليمان عبد المالك، وإخراج يحيى إسماعيل.
مواضيع ممكن تعجبك
أحدث الأخبار
