استضافت فانا إمام في حلقة الأربعاء من «عيش صباحك» على «نجوم إف.إم» الفنانة الشابة جهاد حسام الدين.
«بطن الحوت»
وحكت جهاد عن مشاركتها الغنائية الأخيرة في مسلسل «بطن الحوت» الذي عُرض مؤخرًا وبداياتها في عالم الغناء قبل التمثيل وقالت: «في الأول ما كانش في مخي إني أغني لكن كان الموضوع مجرد إني بحب أقول الكلام ده، وبعد كده اكتشفت صوتي وبدأت آخد ورش وأتعلم، وأنا بحب الغنا أوي لكن بستصعبه شوية، وفيه علاقة حب وكره بيني وبينه، وما بعرفش أغني حاجة مش حاساها وده حصل شوية في أغاني بطن الحوت، والاغاني كانت اختيار أستاذ أحمد فوزي صالح».
وتابعت عن أغنية «الدرب» من المسلسل: «الأغنية فلكلور سعيدي وهي بتعتمد على كلمة (الميناء) واستخداماتها فمرة بقول كالمينا ومرة كلّمينا ومرة كل منّا».
ليه لأ
وعن بداياتها التمثيلية من خلال مسلسل «ليه لأ» قالت: «عملت إعلان مع أستاذة مريم أبو عوف، بس قبلها كنت لفيت على كل مكاتب الكاستنج في مصر من إعلانات لمسلسلات وأفلام، فاسمي موجود عندهم فبقوا بيكلموني، لكن في الدور ده بالذات جالي بعد الإعلان مع أستاذة مريم أبو عوف، فهي قالت لأستاذ مودي شاهين إنه يجيبني أعمل أوديشن وعملت على دور معين وبعدين غيروه، لحد ما اختاروني، واللذيذ في ليه لأ إن الدور كان مختلف عن شخصيتي الحقيقية، وأنا محظوظة إني أبدأ بدور زي ده مختلف تمامًا يعرفني على الناس ويبقوا مقتنعين بيا، وده كانت حاجة في صالحي».
وعن أدوارها التي قدمتها حتى الآن، قالت: «مفيش ندم على أي دور عملته لأني في مرحلة تعلم فأي حاجة بعملها حلوة أو وحشة بتعلم منها، طبعا نفسي أبقى بنقي الحاجات اللي بعملها، لكن مش دايمًا ده متاح في الأول، فبيبقى عندي الحتة حتى لو الحاجة مش حلوة أنا اجتهد وأطلع منها الحاجة الحلوة، لحد ما الحاجة الحلوة تيجي لوحدها بعدين، وحتى لو المخرج والكاتب أحسن حد في الدنيا لازم يبقى فيه بُعد لإضافة الممثل على الشخصية، وفي سفاح الجيزة الدور مكتوب سطور صغيرة وبالشغل والكلام مع المخرج والمحيط واللوكيشن ده خلاني أقدر أزود على المكتوب».
مواضيع ممكن تعجبك
أحدث الأخبار