استضاف يوسف التهامي وفانا إمام في حلقة الأربعاء من «عيش صباحك» على «نجوم إف.إم»، المخرج والممثل حسام الحسيني.
وعن الأقرب له بين إخراج الإعلانات وكليبات الأغاني، قال: «الأقرب ليا هو كليبات الأغاني، لأنه مفيش فيها قيود لأن كل الفنانين اللي بشتغل معاهم ما بيتدخلوش وهم بيثقوا فيا وأنا بذاكر جمهورهم وبفهم الأغنية كويس، وبحلم بالكليب وبحققه، والثقة اللي ببنيها مع الفنان بتيجي من الحاجات اللي بعملها قبل كده، لأن بحب مهما كان الفنان في حتة عالية بحاول أنقله في حتة أعلى».
وتحدث عن تعاونه مع الفنان محمد رمضان، وقال: «محمد رمضان ممثل أصلًا وما كناش عارفين الناس هتتقبله إزاي كمغني وهو وقتها كان عامل إعلان حلو مع المخرج هادي الباجوري، وكان مكسر الدنيا في رمضان، فقعدت أذاكر رمضان وشوفت له إنترفيو الفنان عمر الشريف بيتكلم عنه كويس أوي، وقعدت أذاكر اللي بيحبوه واللي بيتضايقوا منه، فلما عملت أول أغنية نمبر وان حطيت فيها حاجة اسمها ارتباط عاطفي، حطينا الحاجات السلبية اللي بتتقال لرمضان وإنه بيتفرج عليها علشان يبقى عنده مبرر يرد عليها بعد كده في الأغنية، فبدأ الناس تتعاطف فعلًا».
وتابع: «المتعة في الشغل مع رمضان إنه ممثل مرعب فطول الوقت في الكليبات ببقى عاوز أعمل مشاهد تمثيل وقصة للكليب».
مواضيع ممكن تعجبك
أحدث الأخبار