استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنان الشاب مصطفى منصور للحديث عن أحدث أعماله الفنية.
وتحدث الفنان مصطفى منصور عن أحدث أعماله وهو مسلسل «ورق التوت»، وعن دوره في شخصية «منير»، وقال: «الصعوبة في التدرج بتاع الشخصية وربنا كرمني والآراء كانت عظيمة، وفكرة إنه اتأخر سنتين معنديش فكرة لكن القدر كان إنه نزل في وقت كنت حاسس فيه بيأس في حياتي، وفجأة ربنا إداني الإشارة بالمسلسل ده لما نزل، رغم إنه نزل في أحداث صعبة زي أحداث غزة».
كما تطرق إلى الاعتماد على التمثيل كمصدر دخل أساسي خاصة للشباب الصاعد، وأوضح: «التمثيل لوحده لا يكفي وممكن تحتاج بيزنيش تاني جنب التمثيل لكن ده لفترة معينة لحد ما يبقى ميجا ستار، لأن في الوسط الفني ممكن يكون فيه فرصة لحد مطرقع عالسوشيال ميديا عن حد تعبان بقاله كتير»، وتابع: «فيه ناس بتاخد السوشيال ميديا كمدخل، لكن الفكرة مين اللي هيستمر بعد ما يدخل الوسط، ومين عنده كتير في جعبته ومين فاضي».
كما تحدث عن فكرة البطولة الشبابية الكاملة، وقال: «ممكن عمل يقوم على بطولة شبابية كاملة لكن يكون فيه أسس معينة من مخرج مهم وشركة إنتاج محترمة ونص محترم».
وأوضح الفنان مصطفى منصور «أنا حاليًا بدور على الأكشن، وممكن أفضّل الأكشن على الكوميدي لكن برده على حسب مين المخرج والكاتب»، وأكد: «اللي لا يمكن أشتغل فيه، هي شخصيات الخاين أو الشخص اللي ضد الخير، إلا لو بقيت ميجا ستار فأقدر أعمل الناحيتين، لأن الناس بتصدق الشخصية فبتربطها بشخصيتي الحقيقية، فأنا بختار الشخصية اللي تحبب الناس فيا أكتر»، مضيفًا: «نفسي أقدم دور الشخصية الشريرة لكن في مرحلة معينة، وهقدمها من وجهة نظر إيه اللي وداه للشر».
مواضيع ممكن تعجبك
أحدث الأخبار